Promoción Económica

Berocasion volverá do 25 ao 27 de agosto no seu emprazamento orixinal da zona do Rego da Balsa

Xoves 13 de xullo do 2023

O sector reuniuse este xoves no mercado municipal

Berocasión celebra a maioría de idade volvendo ao seu emprazamento orixinal na zona do Rego da Balsa. Os numerosos representantes do sector da automoción que acudiron hoxe no mercado municipal á reunión convocada por Axober, que volve contar coa colaboración do Concello de Carballo, acordaron non só regresar ao espazo urbano no que naceu a feira hai 18 anos senón tamén as datas para a súa celebración: 25, 26 e 27 de agosto.

Polo momento hai 13 participantes confirmados, pero a listaxe podería verse incrementada, xa que aínda hai marxe para incorporacións.

Nas tres últimas edicións, dende a pandemia, Berocasión celebrouse co formato de xornadas de portas abertas nos propios establecementos. Este ano, o público poderá volver gozar na zona do Rego da Balsa da maior feira do vehículo de ocasión de Galicia en espazos abertos.