PLENO MUNICIPAL
Martes 27 de setembro do 2005
O Pleno municipal de Carballo decidiu estimar o recurso presentado pola Federación Galega de Construción contra o prego de condicións administrativas para a concesión do novo aparcadoiro e do edificio comercial na Praza do Concello. Con esta modificación o prazo de presentación de ofertas amplíase ao tempo que se lle abre a posibilidade a máis empresas para optar ao concurso público.
VISITA INSTITUCIONAL
Luns 26 de setembro do 2005
O alcalde de Carballo, Evencio Ferrero, acompañado doutros membros da corporación municipal, recibirán o martes 27 de setembro o delegado provincial de Política territorial, Obras públicas e Transporte, Jacinto Parga Fernández, que visitará a segunda fase das obras da travesía principal de Carballo, que están a piques de rematar.
LECER
Luns 26 de setembro do 2005
O Centro de información á muller de Carballo abre o prazo de inscrición para participar no curso de risoterapia e relaxación que se celebrará entre os días 19 de outubro e 11 de novembro, no Pazo da Cultura. Os interesados pódense anotar ata o 7 de outubro nas oficinas do Concello ou no teléfono 981 700 688.
LECER
Venres 23 de setembro do 2005
A representación teatral da obra Lionel, o malestar do benestar e a celebración dunha conferencia sobre o importante papel da vila de Carballo na época romana centran a oferta lúdica do concello nesta fin de semana. O espectáculo de teatro corre a cargo da compañía coruñesa Casahamlet e celébrase o venres 23 ás 21.00 horas, mentres que o relatorio está previsto para o sábado 24 ás 12.00 horas. Ambas as dúas actividades celébranse no Pazo da Cultura.
DESENVOLVEMENTO RURAL
Venres 23 de setembro do 2005
O alcalde de Carballo, Evencio Ferrero, acompañou o conselleiro de Medio rural, Alfredo Suárez Canal, no encontro que mantivo no Concello co sector agrogandeiro da comarca de Bergantiños para coñecer as súas carencias e demandas e para lles explicar a estratexia do novo goberno nesta materia. "Con este tipo de actos visualízase a intención da Consellaría de entrar en contacto coas inquedanzas do sector e de coñecer a súa realidade", sinalou o alcalde.
PROGRAMA AGADER
Venres 23 de setembro do 2005
O conselleiro de Medio rural, Alfredo Suárez Canal, visitou dous dos oito programas de desenvolvemento rural que a Consellaría que dirixe apoia en Carballo, e nos que se investirán un total de 3.427.994 euros. Durante a visita estivo acompañado polo alcalde de Carballo, Evencio Ferrero, e por outros membros da corporación municipal.
VISITA INSTITUCIONAL
Xoves 22 de setembro do 2005
O alcalde de Carballo, Evencio Ferrero, acompañado doutros membros da corporación municipal recibirá a visita institucional do conselleiro de Medio rural, Alfredo Suárez Canal, o venres 23 de setembro, a partir das 10.00 horas. O conselleiro manterá un encontro aberto co sector agrogandeiro da comarca e visitará diversas obras do programa Agader.
TEATRO
Xoves 22 de setembro do 2005
A XIV edición do Festival Internacional Outono de Teatro (Fiot) de Carballo arrincará con Medea, a estranxeira, a última montaxe da compañía andaluza Atalaya. Debido á importancia que ten no espectáculo a muller e a súa integración social, no patrocinio colabora tamén o Centro de información á muller municipal (CIM).
CULTURA
Mércores 21 de setembro do 2005
O Museo de Bergantiños de Carballo acolle a mostra Galicia, camiño celeste do fotógrafo coruñés Xurxo Lobato. O alcalde, Evencio Ferrero, inaugura a mostra o xoves 22 de setembro ás 20.30 horas, que estará aberta ao público ata o o 20 de outubro.
RELACIÓNS INSTITUCIONAIS
Mércores 21 de setembro do 2005
A construción do hospital comarcal en Carballo para "reducir as listas de espera e mellorar a calidade asistencial" en Bergantiños foi unha das demandas que o alcalde de Carballo, Evencio Ferrero, e os concelleiros delegados de Urbanismo, Manuel Andrade, e Facenda, José Antonio Viña, lle presentaron ao vicepresidente da Xunta de Galicia, Anxo Quintana, durante o encontro que mantiveron o 21 de setembro.
RELACIÓNS INSTITUCIONAIS
Mércores 21 de setembro do 2005
O vicepresidente da Igualdade e do Benestar, Anxo Quintana, mantivo un encontro co alcalde de Carballo, Evencio Ferrero, e cos concelleiros delegados de Urbanismo, Manuel Andrade, e de Facenda, José Antonio Viña, no que se lle presentaron diversos proxectos sobre os que anunciou o compromiso da Xunta de Galicia. Anxo Quintana sinalou tamén a súa vontade "de que o goberno tripartito de Carballo siga xerando proxectos ilusionantes para o concello".
RELACIÓNS INSTITUCIONAIS
Martes 20 de setembro do 2005
O alcalde de Carballo, Evencio Ferrero, acompañado dos concelleiros delegados de Urbanismo, Manuel Andrade, e de Facenda, José Antonio Viña, manterán unha reunión co vicepresidente da Igualdade e do Benestar, Anxo Quintana, na que lle presentarán un plan estratéxico para o desenvolvemento de Carballo a curto e medio prazo. O obxectivo deste encontro é "demandar o apoio do goberno galego", segundo indicou o alcalde.
.jpg)