SESIÓN PLENARIA
Martes 21 de marzo do 2006
A aprobación do Regulamento de participación cidadá será un dos puntos para debater na Comisión Informativa de Acción Social, Participación e Persoal, que vai ter lugar o mércores 22 de marzo. Será o paso previo á súa inclusión na orde do día do pleno ordinario do vindeiro luns, logo de que os diferentes voceiros dos grupos políticos municipais debateran o documento en varias xuntanzas, a última celebrada no día de onte.
MEDIO AMBIENTE
Martes 21 de marzo do 2006
Coincidindo coa celebración do Día Forestal Mundial, o Concello de Carballo repartiu máis de medio centenar de árbores autóctonas entre os centros de ensino da localidade. Como é costume, o alcalde de Carballo participará esta tarde na plantación das árbores nun deses centros escolares, en concreto no CEIP Bergantiños a partir das 16.00 horas. Tamén asisitirá o concelleiro de Servizos e Mantemento, Luís Lamas.
XUSTIZA
Martes 21 de marzo do 2006
O conselleiro de Presidencia, José Luis Méndez Romeu, e o presidente do Tribunal Superior de Xustiza de Galicia, Jesús Souto, anunciaron tras a xuntanza da Comisión Mixta de Xustiza que Carballo contará cunha nova unidade xudicial. Jesús Souto manifesto que sería normal que xa estivese funcionando a finais do ano 2006, mentres que Méndez Romeu argumentou que a solicitude do terceiro xulgado de Carballo responde a razóns de prioridade.
EDUACIÓN
Luns 20 de marzo do 2006
A Comisión Especial de Seguridade Cidadán reúnese este luns, 20 de marzo, cos Directores dos I.E.S de Carballo na Casa do Concello. A xuntanza, que comezará ás 19,00 horas, ten por obxecto analizar a seguridade cidadán nos centros de ensino.
MULLER
Luns 20 de marzo do 2006
O vindeiro xoves, 23 de marzo o Concello de Carballo organiza diferentes actividades, en colaboración coa Secretaría Xeral de Igualdade, para celebrar o Día Internacional da Muller. Ao longo de todo ese día desenvolveranse actos que teñen por obxecto a sensibilización e información sobre os dereitos das mulleres. O pasado día 8 de marzo, a Comisión Especial da Muller xa aprobou unha declaración institucional co gallo da celebración do Día Internacional da Muller.
XUNTA DE GOBERNO LOCAL
Luns 20 de marzo do 2006
A Xunta de Goberno Local acordou solicitar varias subvencións na xuntanza mantida este luns, 20 de marzo, na Casa do Concello. Aprobáronse un total de oito solicitudes, referidas ao Conservatorio Profesional de Música de Carballo, equipamentos para instalacións culturais, limpeza de praias, obras de adaptación, mellora e equipamento das sedes das entidades locais de Galicia, orientadores laborais, ANPA A Granxa para biblioteca escolar, contratación temporal de auxiliares de policía local para a tempada de verán e Carballo Activa para a empresa Argamatic S.L.
PROGRAMACIÓN DEPORTIVA
Venres 17 de marzo do 2006
Este sábado, 18 de marzo, está prevista a chegada dos rapaces do concello que, durante unha semana, participaron da Campaña de Esquí, que, para nenos de 10 a 13 anos, organizou a Deputación da Coruña. Os rapaces chegarán a Carballo, en principio, entre as 09,00 horas e as 11,00 horas do sábado, estando prevista a salida de Huesca esta tarde noite, a partir das 20,00 horas.
OBRAS
Venres 17 de marzo do 2006
As obras de sustitución da cuberta e tratamento de fachadas veñen de comezar no CEIP Bergantiños. Os traballos de mellora foron adxudicados a Alicatados e Revestimentos Gómez Crespo S.L. por un importe de 194.822 euros.
CULTURA
Venres 17 de marzo do 2006
O Concello de Carballo vai participar este ano do programa organizado pola Deputación da Coruña Vivir o Mundo, que pretende achegar aos rapaces e rapazas da provincia a Roma, cidade de gran interese monumental e cultural. O Concello conta con 12 prazas adxudicadas para unha viaxe da que se poderán beneficiar aqueles que teñan entre 12 e 14 anos (ambas incluidas) no mes de maio de 2006. A duración da viaxe é de catro días / tres noites, con réxime de pensión completa e o desprazamento, tanto a ida como o regreso, farase en autobús desde os concellos ata a algún dos aeroportos existentes na provincia e, en avión, desde estes ata Roma.
CULTURA
Xoves 16 de marzo do 2006
A asociación Astrober -Agrupación Astronómica de Bergantiños- realizará este xoves, 16 de marzo, unha visita guiada á exposición As profundidades do Cosmos, á que pode asistir o público en xeral a partir das 20,30 horas no Museo de Bergantiños. Será o acto de despedida da exposición que a Deputación da Coruña achegou a Carballo e que contou con numeroso público durante toda a semana.
VENRES CULTURAIS
Xoves 16 de marzo do 2006
A soprano galega Susana de Lorenzo ofrecerá este venres, 17 de marzo, no Pazo da Cultura, o segundo dos concertos do ciclo musical En feminino, incluido na progamación dos Venres Culturais do Concello de Carballo. Susana de Lorenzo interpretará o concerto Do Bel canto a Brodway, unha mostra de música lírica que abrague desde a ópera ata o musical, pasando polo lied xermánico, a chanson francesa e o bel canto italiano, para finalizar cos temas máis populares de Broadway do século XX. O concerto comezará ás 21,00 horas e a entrada é gratuita.
OBRAS
Mércores 15 de marzo do 2006
A Brigada de Obras do Concello de Carballo ven de comenzar os traballos de rebacheo en diferentes pistas do rural que presentaban deficiencias no asfaltado. A actuación comezou onte pola zona da Alta de Rus e continuará durante toda a semana sempre que as boas condicións climatolóxicas o permitan.
.jpg)