ENSINO
Luns 26 de xuño do 2006
Este luns, 26 de xuño, ábrense os prazos de preinscrición na Escola Oficial de Idiomas de Carballo. Este ano, como novidade, ofrécense dúas linguas, 1º curso de francés e 1º, 2º e 3º curso de inglés. Os prazos de preinscrición para os alumnos que se matriculan en primeiro, por primeira vez, son do 26 de xuño ao 14 de xullo, no primeiro prazo, e do 1 ao 15 de setembro, no segundo prazo. Para os alumnos de 2º de inglés, as datas de matrícula son o 6 e 7 de xullo e para os de 3º de inglés o 3 e 4 de xullo.
CULTURA
Luns 26 de xuño do 2006
A Praza do Concello de Carballo é escenario, na noite de hoxe luns, do último dos concertos incluidos na programación das Festas do San Xoán. O grupo madrileño Pereza porá a nota musical na Praza do Concello, a partir das 23,00 horas, nunha xornada que conta con numerosos actos. Pereza ven de publicar o seu último album neste 2006, baixo o título de Los amigos de los animales. É o cuarto traballo desde a súa creación, logo de publicar en 2001 Pereza, no 2003 Algo para cantar e Animales no 2005.O dúo formado por Leiva -voz y baixo- e Rubén -guitarra e voz- fai escala en Carballo, no quinto concerto dunha xira iniciada hai pouco máis dunha semana e que rematará mediado o mes de outubro en Zaragoza.
LITORAL
Venres 23 de xuño do 2006
O alcalde de Carballo, Evencio Ferrero, e o concelleiro de Praias e Socorrismo, Antonio Longueira, acuden o luns, 26 de xuño, a Sanxenxo, a participar do acto de entrega de bandeiras azuis para as praias galegas. O acto estará presidido polo presidente da Xunta de Galicia, Emilio Pérez Touriño, e tamén participarán do mesmo o Conselleiro de Medio Ambiente e Desenvolvemento Sostible, Manuel Vázquez, o presidente de ADEAC, José Ramón Sánchez e o alcalde de Sanxenxo, Telmo Martín. O Concello de Carballo é distinguido este ano con dúas bandeiras azuis, para as praias de Pedra do Sal e Razo.
CULTURA
Venres 23 de xuño do 2006
O grupo Lamatumbá será o encargado de abrir, este venres 23 de xuño, os concertos do San Xoán. A formación ourensana ofrecerá o seu espectáculo Unha noite no muiño, logo de acadar moitos éxitos co seu traballo Lume (para que saia o sol), á explanada de Rego da Balsa, detrás da antiga estación de autobuses, a partir das 00,30 horas. Lamatumbá é unha das propostas máis frescas e irreverentes do actual panorama musical galego. Unha mestura orixinal de reggae, samba, rumba e rock que sorprende polo seu carácter propio. Dende 1998, ano do seu debut, o seu nome é sinónimo de festa alí por onde pasa. O seu disco Lume (para que saia o sol) é un traballo sincero e moi persoal que arrecende a mares tropicais e a rías galegas.
URBANISMO
Venres 23 de xuño do 2006
A mesa de contratación acordou, por unanimidade de todos os seus membros, propor ao Pleno que declare deserto o concurso de contratación da construción e explotación do aparcadoiro e do edificio comercial da Praza do Concello. A mesa de contratación reuniuse este venres, 23 de xuño, e adoptou a decisión por unanimidade logo de comprobar os informes que descartaban a viabilidade da oferta presentada por Surtiser para o proxecto do aparcamento soterrado e reforma do mercado.
LITORAL
Xoves 22 de xuño do 2006
A obra de consolidación dos teludes de Razo podería estar rematada nun prazo de quince días. Así se puxo de manifesto esta mañán, na visita que o Xefe de Demarcación de Costas, Rafael Eimil, fixo as praias de Razo e Baldaio co obxectivo de facer un seguimento ás obras de recuperación do sistema natural do litoral.
CULTURA
Xoves 22 de xuño do 2006
O profesor carballés, Xosé Ramón Freixeiro Mato, destacou a necesidade de preservar o patrimonio cultural e natural no pregón inaugural das festas do San Xoán. Freixeiro Mato ofreceu un discurso cheo de referencias literarias de autores galegos, ademáis de facer unha exaltación do propio durante media hora. Ao principio do pregón, Freixeiro congratulouse de que o Concello de Carballo fora "un dos concellos onde máis se fala galego, que non é unha opción lingüística senón un índice de calidade humana, de respecto aos nosos antergos, unha lingua que nos une e nos representa na nosa diversidade".
URBANISMO
Xoves 22 de xuño do 2006
O informe emitido polo Xefe do Servizo de Asistencia Económica a Municipios da Deputación da Coruña conclúe que a documentación presentada pola empresa Surtiser para licitar na obra do aparcamento soterrado e reforma do mercado de Carballo non pode ser admitida. O informe pon de manifesto que o licitador non pode ser admitido por falta de capacidade de obrar, falta de acreditación da solvencia económico-financieira, por non acreditar a solvencia técnica e non aportar a póliza de responsabilidade civil ao seu nome. Logo de recibir o informe, a mesa de contratación reunirase mañán venres, 23 de xuño, ás 13,00 horas, na Casa do Concello.
SERVIZOS
Mércores 21 de xuño do 2006
O Concello de Carballo, a través das concellarías de Ensino e Servizos, está a levar a cabo a renovación das áreas de xogos infantís nas escolas unitarias e colexios da localidade. Faino coa instalación, principalmente, de bambáns, nunha primeira actuación que terá continuidade coa dotacións de tobogáns e chinchóns.
CULTURA
Mércores 21 de xuño do 2006
O profesor carballés Xosé Ramón Freixeiro Mato será o encargado de facer o pregón inaugural das festas do San Xoán, este mercores 21 de xuño, a partir das 21.00 horas na Praza do Concello. As festas patronais de Carballo comezaron este mediodía coas bombas de palenque, que anunciaron o inicio dunha festa que se prolongará até o día 27 e que remetará o día 2 de xullo coa tradicional Festa do Bosque. No primeiro día de festa, a música é a principal protagonista.
OBRAS
Mércores 21 de xuño do 2006
O Concello de Carballo procede este mércores, 21 de xuño, á apertura da rúa do Gravador Manuel Facal. A rúa será transitable a partir das 14.00 horas, logo de recibir unha capa de aglomerado que permitirá o tránsito de vehículos. O alcalde de Carballo e diferentes membros do grupo de goberno estarán presentes no acto de apertura. O obxectivo do Concello era o de poder abrir a rúa para as festas do San Xoán, co ánimo de desconxestionar o tráfico e permitir unha maior fluidez no contorno do centro da localidade. Así, os condutores poderán ter acceso á rúa da Vila de Negreira desde a Gran Vía, á altura da Praza do Concello.
MEDIO AMBIENTE
Martes 20 de xuño do 2006
A primeiros de ano a Concellaría de Medio Ambiente do Concello de Carballo propoñíalle un reto á cidadanía, baixar dun 40% o índice de impropios no colector amarelo. No mes de xaneiro o índice de impropios no colector amarelo superaba o 60%, co cal o Concello estaba sendo penalizado pola Consellaría ao non cumplir cos compromisos de reciclaxe. No pasado mes de marzo esta porcentaxe baixara até o 38% e a última comunicación reflicte que o índice do mes de maio foi dun 33%.
.jpg)