LITORAL
Martes 1 de agosto do 2006
A Ruta de los 10.000 da Fundación Intervida chega esta fin de semana a Carballo na súa segunda visita á provincia da Coruña, xunto á caravana Moviplaya, co obxectivo de conseguir o apoio de 10.000 novos padriños para por en marcha un proxecto de desenvolvemento en El Salvador, que beneficiará a 18 comunidades. Coincidindo coa celebración da proba do campionato de España de voley-praia, o areal de Razo será, do 4 ao 6 de agosto, o vindeiro escenario de Moviplaya -a xira estival que promove Movistar- que ofrece aos visitantes a posibilidade de participar en actividades lúdicas durante o día e a noite como xogos, espectáculos, clases de aeróbic, bailes de salón, cine e música.
ACCIÓN SOCIAL
Luns 31 de xullo do 2006
O director xeral de Acción Social, Xosé Bieito Seara, visita esta tarde de luns Carballo, coa intención de coñecer as instalacións de ASPABER e o xeriátrico. Xosé Bieito Seara chegou a Carballo contra as 15,00 horas, onde foi recibido por parte do grupo de goberno. As visitas iniciaranse a primeira hora da da tarde, principiando por ASPABER.
PLENO
Luns 31 de xullo do 2006
A corporación municipal de Carballo declarará deserto, na sesión plenaria ordinaria a celebrar este luns, o concurso para a construción e explotación dun aparcadoiro soterrado e un edificio de carácter comercial na Praza do Concello. Será un dos puntos da orde do día, que inclúe ademáis o inicio do procedemento para a adxudicación, mediante procedemento negociado con publicidade, da concesión da obra, polo que as empresas interesadas no proxecto poderán ser invitadas a participar do proceso.
CULTURA
Luns 31 de xullo do 2006
A celebración dunha das probas do Campionato de España de voley-praia, a vindeira fin de semana en Razo, será un dos grandes atractivos das actividades incluidas no programa do Verán Cultural para a primeira semana de agosto. Será a primeira vez que Carballo acolla unha proba do circuito nacional, para o que se destinarán 6.000 metros cadrados de areal. A montaxe comezará xa mañán martes, 1 de agosto, e moverá da orde de 15 trailers e 150 persoas. Ademáis dos partidos de voley-praia, haberá un montante paralelo de actividades para os máis pequenos, no que será sen dúbida un grande espectáculo.
PLENO
Venres 28 de xullo do 2006
Catro empresas están interesadas no proxecto para a construción e explotación dun aparcadoiro soterrado e un edificio de carácter comercial na Praza do Concello, segundo manifestou o alcalde de Carballo, Evencio Ferrero. O rexedor local afirmou que "o goberno municipal ten coñecemento que hai empresas interesadas en presentar ofertas, tanto de Galicia como de fora de Galicia". A corporación municipal declarará o vindeiro luns, na sesión plenaria ordinaria deste mes de xullo, deserto o concurso, ademais de incluír na orde do día o inicio do procedemento para a adxudicación, mediante procedemento negociado con publicidade, a concesión da obra, polo que as empresas interesadas no proxecto poderán ser invitadas a participar do proceso.
SOLIDARIEDADE
Venres 28 de xullo do 2006
O alcalde de Carballo, Evencio Ferrero, o representante do Centro de Transfusión de Galicia, Julio Flores, e o responsable de Protección Civil en Carballo, Franciso Javier Souto, presentaron na casa do Concello a campaña Comparte saúde. Doa sangue, que se desenvolverá en Carballo o martes 1 e o mércores 2 de agosto. Coa campaña de doazón de sangue, o Concello trata de promover a participación dos/as carballeses/as para atender unha demanda importante por parte dos centros sanitarios galegos durante os meses de verán, que van precisar arredor de 35.000 doazóns de sangue.
TURISMO
Venres 28 de xullo do 2006
O director xeral de Turismo, Rubén Lois, oficia durante a xornada de hoxe venres unha visita ao Concello de Carballo, que aproveita para coñecer varios puntos estratéxicos do turismo na localidade. O alcalde de Carballo e os concelleiros de Turismo, Facenda e Cultura recibiron a Rubén Lois na Casa do Concello, antes de visitar o Museo de Bergantiños e o Pazo da Cultura. O director xeral de Turismo reafirmouse nos compromisos da Dirección Xeral con Carballo, no tocante ao Punto de Información Turística, á mellora do espazo turístico do litoral carballés e ao Plan de Dinamización Turístico.
TURISMO
Xoves 27 de xullo do 2006
O Director Xeral de Turismo, Rubén Lois, realiza unha visita institucional ao Concello de Carballo este venres, 28 de xullo. Rubén Lois será recibido por membros da corporación municipal ás 12,30 horas na Casa do Concello, antes de manter un encontro cos medios de comunicación. Acto seguido, iniciará unha rolda de visitas a distintos lugares da localidade.
COMISIÓNS INFORMATIVAS
Xoves 27 de xullo do 2006
A sesión plenaria ordinaria deste mes de xullo, a celebrar o vindeiro luns, incluirá na orde do día a aprobación inicial da Ordenanza reguladora da prestación dos servizos contidos no programa Concilia e dos seus prezos públicos. Trátase dun servizo que permitirá ás nais e pais deixar aos seus fillos e fillas no centro de ensino desde as 07,30 horas até o comezo da xornada escolar. O asunto foi debatido na comisión informativa de Acción Social, Participación e Persoal, que contemplou ademáis asuntos como a proposta de adhesión ao convenio do Consorcio de Servizos Sociais, coa intención de crear unha nova escola infantil municipal, e a ampliación da Zona Azul na rúa Gran Vía, na súa marxe dereita, desde a intersección coa rúa Pintor Urbano Lugrís até a confluencia coa rúa Doctor Fleming. Ambos asuntos están incluidos, igualmente, na orde do día da vindeira sesión plenaria.
CULTURA
Mércores 26 de xullo do 2006
O Museo de Bergantiños acolle a partir deste xoves, 27 de xullo, a exposición Lembranzas dun viaxeiro, do autor santiagués afincado en Carballo, Ricardo Outes. A mostra está composta por 31 cadros e poderá visitarse até o vindeiro 30 de agosto.
COMISIÓNS INFORMATIVAS
Mércores 26 de xullo do 2006
A Casa do Concello acolle este mércores a xuntanza das comisións informativas de Asuntos Económicos e Especial de Contas, de Acción Social, Participación e Persoal e de Urbanismo e Desenvolvemento Rural, a partir das 19.00 horas. A primeira das comisións que se celebra é a de Asuntos Económicos e Especial de Contas, que inclúe a declaración de deserto o concurso para a construción e explotación dun aparcadoiro soterrado e un edificio de carácter comercial na Praza do Concello. Outro dos puntos, na mesma liña, inclué o inicio do procedemento para a adxudicación, mediante procedemento negociado con publicidade, a concesión da obra, polo que as empresas interesadas no proxecto poderán ser invitadas a participar do proceso.
XUNTA DE GOBERNO LOCAL
Mércores 26 de xullo do 2006
A Xunta de Goberno Local ven de aprobar, na súa última sesión, licenzas de obra para a construcción de dous edificios que albergarían un total de 20 novas vivendas, nas rúas San Martiño e Cuba. Ademáis, aprobáronse licenzas para a construcción de tres vivendas unifamiliares e un proxecto de tres vivendas unifamiliares. Os datos súmanse aos rexistrados no primeiro semestre do ano, no que se tramitaron licenzas para 409 vivendas en bloques de edificios no núcleo urbano e 48 vivendas unifamiliares nas zonas de núcleos rurais.
.jpg)