CULTURA
Martes 5 de decembro do 2006
O Pazo da Cultura acolle este martes, 5 de decembro, a primeira das actuacións do programa Carballo EnDanza, unha iniciativa coa que se pretende dar a coñecer a danza contemporánea a través das actuacións de tres compañías. A encargada de abrir as actuacións é a compañía Pepe Hevia con Delicado abismo, un espectáculo suxerente e emotivo no que a danza se mestura coa pintura, a través das imaxes, das cores, das mans e dos rostros presentes na obra da pintora catalá Montserrat Gudiol. A actuación comezará ás 21,00 horas.
VISITA
Luns 4 de decembro do 2006
Este luns, 4 de decembro, o Intendente Municipal de Canelones, D. Marcos Carámbula, visita o Concello de Carballo. Estará acompañado do Cónsul Xeral de Uruguai, D. Gonzalo Konche e o Xefe de Asuntos Internacionais da Intendencia de Canelones, D. Igor Santander. O programa da visita inclúe a súa recepción na Alcaldía por parte do alcalde e membros da Corporación Municipal, acto previsto para as 19:00 horas.
OBRAS
Luns 4 de decembro do 2006
O Concello de Carballo asina este martes, 5 de decembro, un contrato para a adquisición dun terreo colindante ao Centro Social de Berdillo, no lugar da Garrida, co fin de mellorar o aproveitamento do seu entorno. A adquisición do terreo permitirá liberar espazo nas inmediacións da construcción e levar a cabo certas melloras que contribuirán a facer un espazo máis armónico e agrupado.
PARTICIPACIÓN CIDADÁN
Luns 4 de decembro do 2006
O Concello de Carballo ven de poñer en marcha tres puntos de información Administratel, unha iniciativa que pretende o achegamento do cidadán á administración. Dacordo co Regulamento de Participación Cidadán, aprobado hai uns meses e co que se pretende o achegamento do cidadán ao goberno local e á participación na súa administración, o Concello pretende que esa participación sexa áxil, intuitiva, moderna e accesible. A instalación das tres terminales de Administratel permitirá o acceso á información, xestións municipais, turismo, prácticas e voluntariado, formación universitaria, bolsas de emprego ou mensaxes a correos electrónicos e teléfonos móbiles de balde.
INDUSTRIA
Venres 1 de decembro do 2006
O Concello de Carballo ven de recibir o plan de sectorización da terceira fase do polígono industrial de Bértoa, nos dous ámbitos de 426.300 e 114.400 metros cadrados. O plan foi realizado por Proyfe SL e a Oficina de Planeamento SA e permitirá dar o seguinte paso de cara ao desenvolvemento da terceira fase, que pasará a ter unha superficie de 1.800.000 metros cadrados.
DEPORTE
Venres 1 de decembro do 2006
A Sala de Xuntas do Concello de Carballo acolleu a presentación da terceira edición do Torneo Internacional de Balonmán Concello de Carballo, a celebrar os días 6, 7 e 8 decembro nos pavillóns Vila de Noia e Carballo Calero. Nove clubes tomarán parte dun torneo que reunirá a uns 240 deportistas. Son o Xiria, Porriño, Ademar de León, Cinse, Oar, Camariñas, Bueu, Oleiros e Maia Stars de Portugal. O mércores día 6 haberá unha xornada completa para os equipos de categoría benxamín e alevín, mentres que o xoves día 7 celebrarase a primeira xornada o torneo das categorías infantil, cadete e masculino, pola tarde, para dar paso o venres ás dúas últimas xornadas, de mañán e de tarde. O sistema de competición será de liguilla e enfrontaranse todos contra todos, coa participación de catro equipos por categoría.
LECER
Venres 1 de decembro do 2006
Este venres tivo lugar a inauguración oficial da pista de xeo ubicada no aparcamento do San Martiño, e que funcionará desde hoxe até o vindeiro mes de febreiro. O alcalde de Carballo, Evencio Ferrero, o concelleiro de Industria e Comercio, Francisco Pérez, e a delegada provincial de Cultura e Deportes, Milagros Lantes, foron os encargados de cortar a cinta que daba por inaugurada a instalación. No acto participaron tamén representantes de Creativa Dixital, Centro Comercial Bergantiños Haley e Caixa Galicia. O director xeral de Deporte non puido finalmente acudir á inauguración, como estaba previsto, aínda que conformou a súa presenza o día 19 de decembro na pista de xeo.
CULTURA
Xoves 30 de novembro do 2006
O Pazo da Cultura de Carballo acolle este venres, a partir das 19,30 horas, a estrea de Bolboreta, a última montaxe da compañía Títeres Trompicallo. É unha proposta novidosa de títeres de mesa, con música en directo e unha espectacular escenografía móbil. A entrada ao espectáculo é libre e gratuita.
ACCESIBILILDADE
Xoves 30 de novembro do 2006
O alcalde de Carballo recollerá este venres, no Cocello de Rábade, o I Premio Galego á Eliminación de Barreiras Arquitectónicas Manuel Ignacio Piñeiro. O acto terá lugar ás 18,00 horas e no mesmo farase entrega do galardón ao Concello de Carballo, que gozou da unanimidade do xurado á hora das votacións. A Asociación de Minusválidos Íntegro foi a que fixo a proposta no seu día, xa que unha das condicións da presentación de candidaturas era que tiña que vir da man dunha asociación integrada en COGAMI. Desde o ano 2003, o Concello de Carballo ten potenciado a tarefa da eliminación das barreiras arquitectónicas dentro do termo municipal, a nivel urbanístico e no interior dos edificios, tanto públicos coma privados.
CULTURA
Xoves 30 de novembro do 2006
O Pazo da Cultura acolleu este xoves a presentación do programa Carballo EnDanza, unha iniciativa coa que se pretende dar a coñecer a danza contemporánea a través das actuacións de tres compañías. Os espectáculos terán lugar os días 5, 6 e 7 de decembro no Pazo da Cultura. A entrada é gratuita con invitación, podéndose recoller éstas no Museo de Bergantiños até o 5 de decembro. Unha persoa poderá retirar, como máximo, catro invitacións. As compañías que actuarán en Carballo son Pepe Hevía, de Cataluña, Disque Danza, de Vigo e Nova Galega de Danza.
CULTURA
Mércores 29 de novembro do 2006
O Pazo da Cultura será escenario, o vindeiro sábado 2 de decembro, do concerto que porá o broche final a unha nova edición do Novembro con Música do Concello de Carballo. A Banda Municipal de Carballo será a encargada de despedir a programación, cunha actuación que terá lugar a partir das 21,00 horas. O Novembro con Música achegou, nesta edición, un total de 13 actuacións desde o pasado 3 de novembro.
CULTURA
Mércores 29 de novembro do 2006
O Pazo da Cultura acolle este mércores, a partir das 21,00 horas, unha nova representación do certame de teatro afecionado organizado pola Dirección Xeral de Xuventude e Solidariedade. A compañía compostelana Eis Teatro representa El método Grohölm, segunda das obras a representar no Pazo da Cultura.
.jpg)