Aprobada por unanimidade a imposición dunha sanción de 32.648,92 euros á concesionaria do servizo do lixo

A corporación municipal tamén aprobou unha moción do BNG contraria á suba do canon de Sogama prevista para o ano que vén

Martes 1 de outubro do 2024

Do mesmo xeito que no pleno de xullo se adoptou por unanimidade o acordo para iniciar o expediente que permitise multar á empresa concesionaria do servizo de recollida e xestión do lixo polo incumprimento do contrato, a corporación municipal volveu aprobar por unanimidade a proposta do goberno para que esa sanción acade os 32.648,92 euros, unha cifra que o portavoz do PP, Rubén Lorenzo, cualificou coma “simbólica” e que o concelleiro de Contratación, Ramón Varela, definiu como “proporcional e axustada a dereito”, tendo en conta ademais que é o primeiro incumprimento en todos os anos de vixencia da concesión do servizo a Carballo UTE e que se suma, ademais, ao que a empresa deixará de percibir polos días nos que non prestou o servizo.

A proposta de sanción foi un dos primeiros asuntos abordados no pleno, que rematou coa aprobación dunha moción presentada polo BNG e defendida polo seu portavoz, Xosé Regueira Varela, sobre a suba do canon de Sogama que vén de anunciar a Xunta de Galicia. Así, fronte aos 68 euros por tonelada que pagaban os concellos a principios deste ano, cando empece o 2025 serán 108 euros por tonelada, un incremento decidido de xeito unilateral e sen consulta aos concellos nin á cidadanía, que van ser os directamente prexudicados.

A moción do BNG, que contou co respaldo do PSOE, inclúe tres medidas: o rexeitamento desa proposta de novas taxas para o 2025, o cambio da política de residuos para primar a reciclaxe sobre a incineración e a creación dunha mesa de traballo entre a Xunta, Sogama e a Fegamp para abordar estas cuestións.

O PP tamén presentara unha moción sobre esta cuestión, pero foi rexeitada.

Outros acordos

Convenio entre o Concello de Carballo e a Secretaría de Estado de Seguridade para reforzar a colaboración e a coordinación entre a Garda Civil e a Policía Local en materia de seguridade cidadá, optimizando deste xeito os recursos humanos e materiais: aprobado por unanimidade.
Denominación de 32 rúas nos núcleos de Pedra do Sal (17), Arnados (8), Carballo (5) e Xoane da Estrada (2) que ou ben carecían de nome ou ben inducían a erro. As novas rúas de Pedra do Sal (Lema) serán Furnas, Baixos de Baldaio, Crebas, 8 de Maio, O Piñeiral, Vapor Solway, Paseo Pedra do Sal, Ángeles Alvariño, Mazaricos, O Xuncal, Biluricos, Carráns, Píllaras, Mariscadoras, Peóns, Camiño As Carreiras e Camiño As Saíñas. As de Arnados (Razo) denominaranse Mar Exeo, Mar Báltico, Xardas, Sargos, Quenllas, Sollas, Monte Peados e Xurelos. As de Carballo serán María Victoria Moreno, Urano, Ramón San Luis Romero, Curros Enríquez e Instituto. E as de Xoane da Estrada (Goiáns), Aciñeiras e Arandeiras. Aprobado por unanimidade.
Concesión de bonificacións de ICIO, IBIU e IAE a catro novas empresas. Os descontos acadarán o 95% en tres casos e o 70% no outro. Aprobada por unanimidade.
Modificación da Relación de Postos de Traballo (RPT) no que respecta á determinación do complemento específico do profesorado do Conservatorio Profesional de Música. Aprobada por unanimidade.
Aprobación definitiva da conta xeral correspondente ao ano 2023, que rematou cuns ingresos de 45.164.807,21 millóns de euros e un superávit de 876.679,22. Aprobada coas abstencións dos dous grupos da oposición.