Unha visita ao Museo Picasso pechou o primeiro módulo da Universidade Sénior en Carballo

Un total de 68 persoas maiores de cincuenta anos participan na primeira edición do Programa de democratización do coñecemento da UDC

Sábado 4 de novembro do 2023 Carballo ao día

Cunha visita ao Museo Picasso rematou o primeiro módulo da Universidade Sénior en Carballo, na que finalmente están matriculadas 68 persoas. Acompañadas polo profesor José Ramón Soraluce, que previamente impartiu unha sesión teórica sobre o autor do Guernica, a maior parte do alumnado participou na excursión á Coruña.

Dado o seu elevado número de participantes foi preciso facer dous grupos para a visita á Casa-Museo de Pablo Picasso, na que dous guías da propia entidade e o profesor Soraluce realizaron as explicacións oportunas. A xornada continuou con outra visita guiada ao IES Eusebio da Guarda e unha ruta guiada desde a rúa Real ata a praza de María Pita.

Con esta actividade concluíu o módulo de arte e patrimonio, no que, ademais de coñecer máis polo miúdo a figura e a obra de Pablo Picasso e a súa relación coa cidade da Coruña, o alumnado asistiu a unha primeira clase con Alberto Sucasas Peón sobre Unha filosofía da amizade: Michel de Montaigne, e con Juan de Dios Ruano aprendeu dun xeito moi ameno sobre os Divertimentos amorosos nos cartóns de Goya.

O Programa de democratización do coñecemento da UDC continuará a partir da semana que vén co módulo de ciencia e tecnoloxía, que traerá á gran aula do auditorio do Fórum Carballo aos profesores Juan José Galán Díaz, o martes 7, para falar sobre a importancia da ciencia e a tecnoloxía ao longo da historia e na sociedade actual; Javier Cremades Ugarte, o xoves 9, cunha sesión teórica sobre Xeobotánica, a ciencia que nos fai entender e valorar o noso entorno, e María Cristina Naya Riveiro, o martes 14, coa clase Matemáticas, existen en todas partes? Unha saída de campo con Javier Cremades, o mércores 15, pechará este segundo módulo. O terceiro, a continuación, versará sobre saúde e benestar.

O programa, que é gratuíto para as persoas participantes, consta de tres módulos con diferentes temáticas, con sesións teóricas, que se celebran de 17.00 a 19.00 horas no Fórum, e sesións prácticas, todas elas impartidas por profesorado da Universidade da Coruña. A Universidade Sénior é un proxecto de formación universitaria específico para maiores de cincuenta anos, e neste caso conta co financiamento da propia UDC, da Xunta de Galicia e do Concello de Carballo.