NESTA NOVA PODES VER O VÍDEO DO ACTO

Inaugurada a escultura de Carlos O Xestal en Lema, a parroquia na que viviu e pola que tanto loitou

Venres 11 de agosto do 2023 Carballo ao día

A Aldea do Couto participou no acto con poesía, música e baile

Carlos Díaz Gestal, O Xestal, e Asunción Antelo, a Rexubeira de Bergantiños, naceron o mesmo día, un 8 de agosto. O primeiro, hai 90 anos; a segunda, hai 104. Pero malia diferenza de idade e a pouca ou nula relación que tiveron en vida, o 8 de agosto do 2023 quedaron unidos para sempre nun acto popular de recoñecemento, homenaxe e divulgación dos seus legados que se celebrou no centro social de Lema, a parroquia na que Carlos Díaz, O Xestal, viviu e pola que tanto loitou, e na que será lembrado sempre coa escultura de madeira, obra do artista da motoserra Yosi Fervenza, que inauguramos co gallo do seu 90º aniversario.

Belén Lendoiro, durante a súa intervención

«O Xestal e Asunción son dúas persoas que representan o mellor da nosa tradición cultural popular. Telos na presentes na nosa memoria é fundamental para non perder de vista as raíces do que somos. Que Carlos e Asunción sigan moitos anos na nosa memoria, na nosa memoria como pobo e nos nosos corazóns», dixo Belén Lendoiro, alcaldesa en funcións, nun emotivo e entrañable acto no que houbo contos, música, baile, poemas, risas e pastel de aniversario, e que, como non podía ser doutro xeito, rematou cos asistentes soprando as candeas.

Escultura realizada por Yosi Fervenza

A presentación correu a cargo da compañía de teatro carballesa Galeatro, que decidiu homenaxeando cunha lectura dramatizada dalgúns dos contos que tan famoso fixeron a Carlos O Xestal. A Aldea do Couto (Ponteceso), onde O Xestal presentou a primeira actividade organizada polo movemento asociativo alá polos anos oitenta, tamén quixo sumarse coa lectura dun poema de Asunción Antelo, a interpretación de Labregha berghantiñana de Sés, unha gaita, unha pandeireta e tres pezas de baile. E como non podía faltar, non faltou o Coro Aires de Bergantiños, unha das numerosas entidades folclóricas que axudou a fundar O Xestal ao longo da súa extensa e frutífera carreira artística.

A celebración reuniu no centro social de Lema, aproveitando a sombra do soportal nun dos días de máis calor do verán, a máis de 150 persoas, na súa maioría veciños e veciñas da parroquia de Lema. O consello parroquial e as asociacións culturais Ría de Lema e O Castro de Lema colaboraron na organización do acto, impulsado pola Concellaría de Participación Veciñal dentro da programación do Ano do Xestal. Se queredes ver como foi pinchade no vídeo.

Vídeos