A Concellaría de Promoción Económica incentiva a actividade das entidades empresariais cunha achega de 70.000 euros

A Xunta de Goberno Local aprobou a concesión de subvencións ás asociacións As Eiroas, CCA e Axober

Luns 4 de xullo do 2022 Carballo ao día

A Xunta de Goberno Local aprobou na súa sesión ordinaria de hoxe a concesión de subvencións a entidades empresariais para o desenvolvemento da súa actividade ao longo deste ano. A Concellería de Promoción Económica realizará unha achega total de 70.000 euros, que se reparten do seguinte xeito:

• Centro Comercial Aberto (CCA): 29.166,67 euros para o financiamento da unidade xerencial e as campañas de promoción comercial e fidelización da clientela.
• Asociación de Xóvenes Empresarios de Bergantiños (Axober): 23.333,33 euros para programas de difusión, formación, promoción e apoio ao tecido empresarial local, Berocasión y Axober Work Party.
• Asociación As Eiroas de Empresarios e Propietarios do Polígono de Bértoa: 17.500 euros para a I Feira do Emprego e a Formación do Polígono de Carballo.

Outros acordos

A Xunta de Goberno Local tamén aprobou a concesión dunha subvención de 6.000 euros á Escola Basket Xiria para o Día do Pequebasket e outra de 8.000 ás Escolas de fútbol Luis Calvo Sanz para o XVI Torneo F7 alevín Concello de Carballo.

Na sesión de hoxe tamén se deu conta da concesión de varias subvencións ao Concello de Carballo por parte de distintos departamentos autonómicos: 31.335,88 euros para a limpeza de praias, 46.035 para o fomento da prevención, reutilización e recollida de residuos, e 58.000 para o Centro de Información á Muller (CIM).

Ademais foron aprobadas facturas de gasto por importe de 50.875,75 euros.