A Unidade de Investigación de Incendios Forestais impulsa un plan de prevención dos lumes na parroquia de Carballo

Persoal do Distrito Forestal, Protección Civil, Policía Local e técnicos municipais celebraron hoxe un encontro para preparar as accións

Venres 13 de maio do 2022 Carballo ao día

A reunión celebrouse na base de Protección Civil

A parroquia de San Xoán Bautista foi escenario en cinco anos de 71 incendios forestais, segundo consta no último Plan de prevención e defensa contra os incendios forestais de Galicia (Pladiga) publicado pola Consellería do Medio Rural. Curiosamente, malia ser a parroquia galega na que máis lumes se rexistran, tamén é a parroquia galega con menor superficie queimada: só 8,78 metros cadrados nos mesmos cinco anos. O problema, polo tanto, non é outro que a reiteración deses pequenos focos, e por iso figura entre as 35 Parroquias de Alta Intensidade Incendiaria (PAII) de Galicia.

Para intentar frear este goteo de pequenos incendios, a Unidade de Investigación de Incendios Forestais (UIFO) impulsa un plan de prevención no que están implicados todos os corpos que traballan contra o lume. Hoxe celebrouse na base de Protección Civil un encontro ao que asistiron membros da UIFO, o xefe do Distrito Forestal, Manuel Capón, e outros representantes do mesmo, axentes ambientais, Protección Civil, Policía Local, bombeiros, técnicos municipais e o concelleiro de Seguridade, Juan Seoane. O obxectivo, como explicou a axente da UIFO Yolanda Camba, foi “analizar a situación dos incendios de interfaz no concello e ver que se pode facer para previlos”. Da xuntanza saíron unha serie de propostas de actuación que se levarán a cabo nos vindeiros meses nesas zonas concretas nas que se rexistran lumes de maneira reiterada.

Os incendios de interfaz son aqueles que se producen en áreas periféricas nas que coinciden zonas forestais e asentamentos humanos, e por iso é tan importante previlos, porque poden afectar ás persoas. A práctica totalidade destes lumes teñen que ver con actividades das persoas, tanto intencionais coma accidentais. O papel da UIFO é o estudo e seguimento desas parroquias para determinar as causas e motivacións dos incendios e tratar de deter aos presuntos incendiarios. A unidade, creada pola Xunta de Galicia o ano pasado, está formada por 15 persoas da escala de axentes ambientais, con dependencia directa do director xeral de Defensa do Monte, e que están desvinculadas das tarefas de extincións para centrarse na investigación.