.jpg)
O Concello de Carballo presenta alegacións ao proxecto do parque eólico Monte Neme
Mércores 13 de abril do 2022 Carballo ao día
O Concello de Carballo vén de rexistrar unha decena de alegacións ao proxecto do parque eólico Monte Neme, que está a tramitar a Consellería de Economía, Emprego e Industria da Xunta de Galicia e que prevé a instalación no noso concello de 4 aeroxeradores, 4 centros de transformación, unha torre meteorolóxica de 115 metros, unha subestación e redes eléctrica, de comunicación e de terras. O parque eólico disporá dunha potencia total máxima de 16 MW.
Por unha banda, segundo o informe técnico elaborado polos servizos municipais, no proxecto sectorial exponse erroneamente que todas as infraestruturas do parque eólico quedan fóra da zona delimitada polo Plan de Ordenación do Litoral (POL), xa que tres aeroxeradores e a torre meteorolóxica, están dentro do ámbito do POL. Ademais, o aeroxerador 2 e a torre meteorolóxica sitúanse nunha zona clasificada como de alto valor ambiental, onde tamén está prevista unha zona de provisión temporal. Así mesmo, a elección de máquinas de gran potencia e tamaño provoca un maior impacto visual, como se pode apreciar nas fotografías das vistas dende Baldaio incluídas no estudo de impacto ambiental.
O Concello de Carballo, preocupado tamén polo impacto acústico, encargou un informe específico a unha empresa especializada. Segundo o estudo realizado, o nivel incluído no proxecto é claramente insuficiente e non reflicte en absoluto unha predición realista dos niveis de emisión de ruído, polo que a empresa promotora do parque eólico debería “cuando menos aportar un estudio específico en profundidad mediante software predictivo adecuado o herramientas similares que permitan una predicción ajustada a la realidad, considerándose la estimación simple del documento indicado como insuficiente para aceptarla como conclusión del impacto previsto por la presencia del parque eólico en su entorno”. Tanto a execución da obra como o funcionamento do parque eólico, producirá un impacto por contaminación acústica que afectará tanto ás persoas como á fauna.
Entre outros aspectos, o informe técnico revela que algúns dos elementos proxectados, como a torre anemométrica, sitúanse no ámbito do Proxecto de abandono e clausura do grupo mineiro Monteneme, polo que por parte da consellería competente deberían analizarse a compatibilidade e as posibles interferencias. Neste sentido, dende o Concello de Carballo proponse que o proxecto do parque eólico sexa remitido á Dirección Xeral de Enerxía e Minas e á Dirección Xeral de Patrimonio Cultural, que non figuran entre os organismos afectados, para que fagan as súas valoracións.