O Concello de Carballo aproba a concesión de axudas a 93 familias para pagar as facturas da luz

Titulares do bono social e persoas que reciben tratamentos de osixenoterapia ou diálise peritoneal nos seus domicilios recibirán un pago único de 200 euros

Luns 11 de abril do 2022 Carballo ao día

A Xunta de Goberno Local aprobou na sesión ordinaria de hoxe a concesión de axudas para o pagamento do subministro enerxético a 93 familias do noso concello. Só foron rexeitadas 3 solicitudes, dúas delas porque se presentaron fóra de prazo e a terceira, por non cumprir cos requisitos establecidos.

As subvencións van destinadas a persoas maiores 18 anos ou menores emancipadas empadroadas no noso concello e que cumpran algunha das seguintes condicións:

• Ser beneficiarias do bono social das diferentes comercializadoras de electricidade.
• Recibir durante o ano 2021, polo menos durante seis meses, osixenoterapia domiciliaria.
• Recibir durante o ano 2021, polo menos durante seis meses, tratamento de diálise peritoneal domiciliaria.

Con esta medida, impulsada dende a Concellaría de Igualdade e Benestar, dende o Concello de Carballo pretendemos axudar ás veciñas e veciños con máis dificultades para facer fronte ás facturas da luz. Cada unha das 93 familias beneficiarias recibirá nas vindeiras semanas unha axuda de 200 euros nun pago único, correspondente á anualidade 2021.

Complemento autonómico

As subvencións do Concello de Carballo son compatibles ademais con outras liñas de axuda. Precisamente a Consellería de Política Social tamén vén de publicar as resolucións de concesión directa de axudas destinadas a paliar a pobreza enerxética correspondentes ao bono social térmico do ano 2021. Neste caso, a Xunta de Galicia achega un complemento de 100 euros a cada familia beneficiaria.

A relación de persoas beneficiarias pode consultarse no apartado da web adicado ao bono, onde consta unicamente o DNI, o importe que lle corresponde e se a documentación está completa ou é necesario que achegue algún tipo de información complementaria. Indícase así mesmo a posibilidade de actualizar información ou renunciar ás axudas. Esta mesma información remítese de xeito individualizado por carta a cada persoa perceptora.