Carballo ofreceu unha emotiva homenaxe ás vítimas da COVID-19

Máis de 120 persoas participaron no acto, que coincidiu co segundo aniversario do inicio da pandemia

Sábado 12 de marzo do 2022 Participación veciñal

Sofie Lage, Juan Carlos Pero, Sabela Perol, Evencio Ferrero e Maica Ures

O descubrimento dunha placa na que pode lerse unha estrofa do fermosísimo poema Inverno, de Celso Emilio Ferreiro, pechou a emotiva homenaxe do pobo de Carballo ás vítimas da COVID-19. Un acto que reuniu este sábado a máis de 120 persoas na mesma praza que dende xullo do ano 2020 acolle a escultura Mágoa, símbolo do compromiso da sociedade carballesa de non esquecer nunca ás persoas falecidas durante a pandemia. No noso concello foron medio centenar.

Máis de 120 persoas asistiron ao acto

A impresionante voz de Gloria Pardines, profesora de Canto no Conservatorio Profesional de Música do Concello de Carballo, acompañada pola Orquestra de Corda do CMUS, que dirixe Emma Urango, deu a benvida ao acto a todas as persoas presentes: veciños e veciñas que acudiron a título individual, pero tamén representantes de todas as entidades sociais que desenvolven a súa actividade no noso concello, dos servizos de emerxencias, das forzas e corpos de seguridade e dos distintos servizos municipais para os que non existiu confinamento, que permaneceron ao pé do canón durante toda a pandemia e que seguen estándoo. Para todas e todos eles foi o primeiro agradecemento da tarde, expresado pola concelleira de Igualdade, Benestar e Sanidade, Maica Ures.

“Tal día coma onte, o 11 de marzo de 2002 –lembrou-, a OMS declaraba o coronavirus como pandemia mundial. Pasaron 730 días. Demasiado tempo xa”. Maica Ures falou da dor, da incerteza, das obrigadas ausencias que sufriron tantas familias, e por iso quixo facer extensiva a homenaxe ao seres queridos das vítimas. Un deles, o fillo dunha das persoas falecidas na residencia Domus Vi de Carballo, tomou a palabra de seguido. Juan Carlos Perol Uzal, que durante dez anos viaxou todas as semanas dende Padrón, onde reside, ata Carballo para visitar a súa nai, intentou explicar os seus sentimentos, pero a emoción case non lle permitiu falar.

Emocionado tamén, o alcalde de Carballo tomou a palabra para pechar as intervencións, lembrando ás vítimas e lembrando que a COVID-19, aínda que con moitísima menos virulencia, segue entre nós, como demostran os casos que se seguen a diagnosticar a diario. Evencio Ferrero reiterou o agradecemento a todas as persoas que puxeron o seu grao de area para que por fin poidamos ver a luz ao final do túnel, e insistiu na importancia de recuperar, a través de eventos como o de hoxe, o contacto e as relacións sociais, que tanta falta nos fan para o noso desenvolvemento como seres humanos.

Música, ofrenda floral e placa

A voz de Gloria Pardines acompañou á Orquestra de Corda do CMUS

O acto continuou cun pequeno concerto da Orquestra de Corda do CMUS, que despois das impresionantes interpretacións de Lascia ch'io pitanga, de Haendel, Ave Verum Corpus, de Mozart, e Canto de berce, de Groba, despediuse co tema What a wonderful world, de Louis Armstrong, porque, como dixo a alumna que o presentou, a pesares de toda a dor que provocou a pandemia, “o mundo é marabilloso".

Sabela, neta dunha persoa falecida durante a pandemia, e Sofie, filla do escultor Fabián Lage, autor de Mágoa, foron as encargadas de realizar a ofrenda floral que, xunto co descubrimento da placa conmemorativa, puxo fin ao acto. Un xardín de azaleas e violas de flor branca, creado para a ocasión pola Brigada Municipal de Xardíns, acompaña dende hoxe a escultura e a placa que lembrarán para sempre ás vítimas da COVID-19 en Carballo.