.jpg)
As familias carballesas depositaron o ano pasado un total de 346.000 quilos de residuos orgánicos nos contedores marróns
O programa conta nestes momentos con máis de 1.500 colaboradores. Súmate ti tamén!
Mércores 5 de xaneiro do 2022 Carballo ao día
As familias e os grandes produtores que participan no programa “Ti tes a chave” depositaron o ano pasado 346.400 quilos de residuos orgánicos nos colectores de cor marrón que temos espallados por toda a zona urbana. Dende a posta en marcha do servizo de recollida selectiva, en xullo do ano 2020, dende Carballo enviamos á planta de compostaxe de Sogama un total de 493.600 quilos de bio-residuos.
Dende o Concello de Carballo queremos agradecer, unha vez máis, a colaboración das máis de 1.400 familias e das 125 empresas que xa están comprometidas coa xestión sostible dos residuos orgánicos, e que nas últimas semanas puideron comprobar, a través das 480 bolsas de compost repartidas, cal é o aproveitamento dos bio-residuos.
Ti tamén podes reducir os residuos e fomentar a compostaxe. Se vives na zona urbana podes solicitar a túa chave para abrir os colectores marróns. Só tes que achegarte de luns a venres, de 10:00 a 14:00 horas, ata o local de Carballo Limpo, situado nas galerías da rúa Desiderio Varela, número 34. Entregarémosche un caldeiro de 10 litros de capacidade para facilitarche a separación dos restos orgánicos no teu fogar, tres atados de bolsas compostables que poderás repoñer cando se che acaben, un tríptico informativo e, por suposto, a chave. E todo de balde!
E se vives en calquera das nosas parroquias e dispós dun terreo de 50 metros cadrados, como mínimo, podes participar no programa de compostaxe doméstica e aproveitar directamente o compost para a túa horta, como xa están facendo case 700 familias carballesas. Descarga a solicitude que atoparás máis abaixo e preséntaa unha vez cuberta no Rexistro Municipal (telematicamente ou de maneira presencial, con cita previa no 981704100). Entregarémosche un composteiro individual de 390 litros de capacidade, fabricado con materiais reciclados e reciclables, e un aireador, e se nalgún momento precisas material estruturante podes recollelo xunto ao Punto Limpo do polígono de Bértoa. Todo, tamén, de balde.
Dende o Concello de Carballo apostamos pola compostaxe como a fórmula máis axeitada para a xestión da denominada quinta fracción dos residuos e queremos animarte a que apostes ti tamén por un sistema que contribúe á redución das emisións de dióxido de carbono, garante un fertilizante de calidade e reduce os custos do servizo de recollida de lixo, xa que a tarifa que se paga a Sogama polo tratamento da quinta fracción é inferior á que se debe abonar pola bolsa negra xenérica.