Carballo e outros 14 concellos galegos de entre 20.000 e 50.000 habitantes reivindican o seu papel estratéxico

Evencio Ferrero e Iván Andrade participaron nunha xuntanza para esixir a fin da discriminación no reparto de fondos europeos

Venres 19 de novembro do 2021 Carballo ao día

Na xuntanza estiveron representados 15 concellos galegos

Carballo é un dos 15 concellos galegos de entre 20.000 e 50.000 habitantes, que participaron esta esta semana no Pazo da Peregrina, en Bertamiráns (Ames), nunha xuntanza convocada dende a Fegamp para reivindicar o seu papel estratéxico dentro de Galicia e a fin da discriminación que sofren no reparto de fondos europeos, como está a pasar cos Next Generation. O noso concello estivo representado polo alcalde, Evencio Ferrero, e polo concelleiro de Innovación, Iván Andrade, que presentaron unha serie de propostas que poñen de manifesto ese papel estratéxico que están a desempeñar concellos coma o noso en diferentes áreas.

Deste xeito, aínda que estes concellos intermedios están a realizar un importante esforzo nas estratexias de mobilidade orientadas a promover a recuperación dos espazos públicos para a cidadanía, unha necesidade que quedou en evidencia coa pandemia, o Ministerio de Transportes, Mobilidade e Axenda Urbana deixounos á marxe dos fondos europeos.

O noso concello estivo representado por Evencio Ferrero e Iván Andrade

Tampouco podemos optar a eses recursos para os necesarios proxectos de eficiencia enerxética, que contribúan á implantación de fontes enerxéticas renovables e á mellora continua das infraestruturas; nin para dar resposta ás crecentes necesidades en materia de servizos sociais, que deben ser unha prioridade para todas as administracións. E o mesmo pode dicirse do deporte, que non só foi unha vía de escape durante a pandemia, senón que constitúe un xeito de fomentar os hábitos de vida saudable que debe promocionarse a través de novos programas e instalacións.

Na xuntanza participaron os concellos de Ames, Arteixo, Cambre, Cangas, Carballo, Culleredo, A Estrada, Lalín, Marín, Narón, Oleiros, Ponteareas, Porriño, Redondela, Ribeira e Vilagarcía (cuxo alcalde é o presidente da Fegamp). A Federación Galega de Municipios e Provincias estima que este grupo de concellos constitúen o grupo con maior déficit de financiamento en termos per cápita, cunha media de 127 euros por habitante, e iso malia que se trata dos concellos que experimentaron o maior aumento de poboación no que vai de século e gañaron máis veciñanza nova.