Avanzan as obras para completar as redes de saneamento e abastecemento na parroquia de Berdillo

En contratación o proxecto da rede de auga potable dende Lema ata Pedra do Sal

Luns 20 de setembro do 2021 Carballo ao día

Luis Lamas e Evencio Ferrero, nas obras da parroquia de Berdillo

O alcalde de Carballo, Evencio Ferrero, e o concelleiro de Obras e Servizos, Luis Lamas, achegáronse ata unha das obras relacionadas co ciclo integral da auga que temos en marcha neste momento, e que nos permitirá completar as redes de abastecemento e saneamento na parroquia de Berdillo. A actuación, que ten un orzamento de 275.000 euros, permitirá estender estes servizos aos lugares do Curro, Aseñado, A Chavella, O Alto e A Redonda, cun total de 32 vivendas.

Con este proxecto completamos un investimento de case 3 millóns de euros en obras hidráulicas realizadas entre o ano pasado e o actual para estender as redes de auga e/ou saneamento a 40 lugares de 12 parroquias, e que seguimos ampliando con novas intervencións.

Neste momento tamén están en marcha, moi avanzadas, as obras das redes de saneamento e abastecemento aos lugares de Leboreo, Requeixo e A Rega, na parroquia de Bértoa, cun orzamento de 368.311,59 euros, e a mellora da rede de abastecemento na rúa Vázquez de Parga, con 42.719,04. En breve arrincarán tamén as redes de abastecemento e saneamento de Cambre e O Outeiro (Lema) e Cambrelle (Razo), cun investimento de 416.971,86 euros.

Na zona costeira, despois da recente entrada en servizo do abastecemento a Lema, agora mesmo temos en contratación a extensión da rede ata Pedra do Sal. Esta nova traída, cun orzamento de 687.472,26 euros, completará un investimento que supera os 3,2 millóns de euros e que permitirá dotar de auga de calidade e en cantidade a boa parte do litoral. O proxecto arrincará no lugar do Igrexario, en Lema. A rede estenderase ao longo de 12.403 metros de tubaxes de distintos diámetros, dotando do servizo aos núcleos de Vilar de Peres, Constenla, Rebordelos e Sambade (parroquia de Rebordelos), Imende e Casadelas (Noicela), e Sambade e Pedra do Sal (Lema). En total, 419 habitantes, segundo os últimos datos oficiais do censo.

Ademais, dentro do POS+ Complementario, estamos á espera da autorización da Deputación da Coruña para contratar novas obras relacionadas co ciclo integral da auga:

• Melloras na rede de abastecemento de auga de distintas rúas da zona urbana, co obxectivo de aumentar a eficiencia do servizo, evitar fugas e seguir eliminando tubaxes de fibrocemento: 169.192,22 euros.
• Conexión dos depósitos das dúas captacións de auga no Bardoso e no Anllóns para que, no caso de que se produza algunha incidencia, poidan separarse as redes e funcionar independentemente: 145.158,91 euros.
• Redes de saneamento e abastecemento a Vila de Uz (Oza): 230.194,51 euros. Con esta actuación completaremos a práctica totalidade dos servizos na parroquia de Oza, na que veñen de rematar tamén as obras para estender o subministro a Serantes, e tamén ao núcleo de Xoane (Goiáns).