O Concello de Carballo formará a 60 persoas desempregadas en carpintaría, soldadura, telecomunicacións e cociña

Este curso impartiranse no Fórum catro especialidades, con 15 alumnos/as en cada unha delas, dentro do plan formativo para o emprego da Xunta

Mércores 15 de setembro do 2021 Carballo ao día

Os cursos impartiranse no Fórum Carballo

Ademais das 20 persoas que se formarán en atención sociosanitaria a dependentes no obradoiro dual de emprego “Carballo Coida”, o noso concello acollerá este curso outras catro accións formativas para persoas desempregadas nas que prepararemos a un total de 60 alumnos/as en carpintaría, soldadura, telecomunicacións e cociña.

Dentro do plan formativo para o emprego, a Xunta de Galicia subvencionará cun total de 270.750 euros catro das sete especialidades solicitadas pola Concellaría de Innovación, Formación e Emprego no mes de xuño. Son as seguintes:

• Cociña: 828 horas
• Operacións auxiliares de montaxe de instalacións electrotécnicas e de telecomunicacións en edificios: 458 horas
• Soldadura con eléctrodo revestigo e TIG: 758 horas
• Montaxe de mobles e elementos de carpintaría: 538 horas

No curso 2021-22 poderán formarse no Fórum Carballo, polo tanto, un total de 80 persoas en distintas especialidades que contan cunha alta demanda de traballadores/as no mercado laboral actual. As persoas que precisen máis información poden dirixirse ás oficinas municipais do Fórum, previa cita no 981709010.