PRESENTACIÓN DOS ACTOS QUE SE CELEBRARÁN ARREDOR DO 17 DE MAIO

Carballo inaugura a Praza Xela Arias como merecida homenaxe á protagonista do Día das Letras Galegas e como símbolo do compromiso coa cultura e coa igualdade

O Concello enviou aos centros de secundaria unha selección de obras de autores locais de recente publicación para as bibliotecas e preto de 2.000 exemplares de libros de Xela Arias para repartir a todo o alumnado

Venres 14 de maio do 2021 Carballo ao día

Evencio Ferrero, Rakele Cavallo, Maruxa Suárez e Marcos Trigo, xunto ao mural da Praza Xela Arias

Este ano en Carballo queremos celebrar dobremente o 17 de maio. Por unha banda, difundindo a obra de Xela Arias (1962-2002), poeta, tradutora, editora e profesora a quen dedicamos un merecido Día das Letras Galegas. Por outra, engadindo o seu nome ao noso rueiro para que ese recoñecemento perdure no tempo, pero tamén para cada vez máis mulleres teñan presenza nel. Deste xeito, na sesión ordinaria celebrada o 26 de abril, o Pleno da Corporación decidiu dedicarlle a Xela Arias unha pequena praza situada entre a rúa Xirona e o Paseo do Anllóns, que ata agora carecía de denominación propia.

Hoxe presentamos as actividades conmemorativas da inauguración da Praza Xela Arias nun acto no que participaron o alcalde, Evencio Ferrero, a concelleira de Normalización Lingüística, Maruxa Suárez; o concelleiro de Cultura, Marcos Trigo, e a artista local Rakele Cavallo, autora do mural conmemorativo que podedes ver na imaxe e que, ademais de sumarse ao longo catálogo de arte pública do noso concello, permanecerá como homenaxe permanente á autora de poemas como o que decora a súa praza. “Para min foi un reto, porque era a primeira vez que facía un retrato tan grande, pero tiña claro cal ía ser o deseño e estou moi contenta co resultado”, asegurou a pintora.

Nese espazo urbano, que, como sinalou o alcalde, “reúne as características perfectas para o evento, á beira do río que nos dá vida”, celebrarase o domingo 16 un acto simbólico de recoñecemento á figura de Xela Arias. Evencio Ferrero destacou “a importancia de que a veciñanza desfrute dos espazos urbanos” e felicitou a Rakele Cavallo por “plasmar de maneira perfecta o obxectivo”.

PROGRAMA PARA OS DÍAS 16 E 17

Maruxa Suárez explicou que a inauguración da Praza Xela Arias é un símbolo do compromiso coa cultura galega e coa promoción da nosa lingua, “máximo expoñente e valor como comunidade”, tal como recolle a Ordenanza para o impulso social da lingua galega no Concello de Carballo; pero tamén coa igualdade, a través de accións como a visibilización de mulleres que destacaron nos ámbitos profesional e social no rueiro. “Xela Arias será a número catorce”, dixo.

A concelleira de Normalización Lingüística destacou a boa acollida da iniciativa entre a veciñanza da praza e deu a coñecer o programa de actos do domingo, no que participarán o compañeiro e o fillo de Xela Arias, a escritora carballesa Rosalía Fernández Rial, libreiros e libreiras, autores/as locais, veciños/as dos dous edificios que hai na praza e membros da corporación, entre outras persoas convidadas. Precisamente, debido ás limitacións de aforo, a asistencia ao acto será con convite.

As actividades do Día das Letras Galegas continuarán o propio 17 de maio co espectáculo “Por Xela!”, unha homenaxe á autora que, como apuntou Marcos Trigo, “une tres disciplinas moi vinculadas a ela: a poesía, a fotografía e a música”. A primeira delas correrá a cargo das poetisas Estíbaliz Espinosa, Helena Salgueiro, Nuria Vil e Vanessa Glemsel, que ofrecerán un recital; da parte fotográfica encárgase Xulio Gil, que foi parella de Xela Arias, e da música, o grupo A banda da loba. As entradas están á venda en www.ataquilla.com

CASE 2.000 LIBROS PARA O ALUMNADO DE SECUNDARIA

Lote de libros enviados aos centros de secundaria

Ademais de organizar estas actividades, o Concello de Carballo tamén realizou esta semana un envío de libros aos catro centros educativos de secundaria: IES Isidro Parga Pondal, IES Alfredo Brañas, IES Monte Neme e CPR Artai. Por unha banda fíxolles chegar preto de 2.000 exemplares dun libro de poemas e fotografías de Xela Arias para repartir un a cada alumno/a, e, por outra, unha selección de libros de publicación recente, na súa maior parte de autores/as locais, para as bibliotecas. Son estes:

“Wolfram”, Alberto Varela Ferreiro
“Alén do tempo dos reloxos”, Raúl González Herrera
“Toponimia de Carballo”, Fernando Cabeza Quiles
“Brevedume”, Xurxo Borrazás
“Carabela”, Paula Carballeira
“El mal sin cura de la Costa da Morte”, Manuel Rey Pan
“O río Anllóns”, varios autores
“Manuel Facal”, Manuel Facal
“Árbores no deserto”, Rosalía Fernández Rial
“Mudanza”, Xurxo Chapela
“Teatro de Manuel Lourenzo” Vol. 1
“Ricardo Carvalho Calero, coraçom de terra”, varios autores
“De Carballo Calero a Carvalho Calero”, varios autores
“Arquitectura e urbanismo. Unha ucronía carballesa”, Xan Fraga
“Xela Arias. Poemas e fotografías”, Xela Arias e Xulio Gil