A VELOCIDADE NAS ZONAS ESCOLARES ESTÁ LIMITADA A 20 KM/H

Redución da velocidade e medidas de protección peonil con actuacións de urbanismo táctico para mellorar a seguridade nas contornas escolares

A Concellaría de Mobilidade reorganiza as contornas do IES Parga Pondal e o CEIP Bergantiños

Martes 4 de maio do 2021 Carballo ao día

O alcalde e os concelleiros de Mobilidade e Obras achegáronse a ver a solución adoptada nos aparcamentos da rúa Vila de Ordes

A mellora da seguridade nas contornas escolares é unha prioridade dentro das políticas de mobilidade do Concello de Carballo. Despois das importantes actuacións urbanísticas que levamos a cabo nos últimos anos nos ámbitos do CEIP Fogar e o IES Alfredo Brañas, o CEIP Xesús San Luís Romero e o CEIP Plurilingüe A Cristina, ou das sucesivas intervencións para eliminar barreiras nas rutas escolares, dende a Concellaría de Mobilidade seguimos a introducir novos elementos que contribúen a mellorar a seguridade da rapazada e da comunidade educativa, pero tamén da veciñanza en xeral.

Nese sentido vimos de renovar a sinalización nas zonas escolares, nas que a velocidade de circulación queda limitada a 20 km/hora, ademais de implementar outras medidas como a colocación de topes de caucho nas prazas de aparcamento da rúa Vila de Ordes, xunto ao CEIP Fogar, evitando así que os vehículos invadan as beirarrúas.

Na contorna do IES Parga Pondal estase a reordenar o espazo con pintura

Esta semana, ademais, puxemos en marcha os primeiros proxectos de urbanismo táctico, unha fórmula de transformación urbana que, mediante a utilización de elementos de mobiliario urbano e pintura, basicamente, permite mudar o espazo urbano. Con este sistema, se a actuación realizada funciona pode facerse permanente, mentres que se é preciso realizar cambios permite axustar o proxecto dun xeito sinxelo e económico.

A primeira intervención de urbanismo táctico estase a desenvolver estes días na zona do IES Isidro Parga Pondal, na que, a proposta do centro, por unha parte realízase unha reordenación dos aparcamentos e, por outra, delimítase unha senda peonil dende a ponte ata o instituto, pola marxe dereita da rúa. A vindeira semana está previsto actuar tamén na contorna do CEIP Bergantiños. Xa dende principios de curso, atendendo as demandas do propio colexio, a rúa Ramón Cabanillas está pechada ao tráfico durante as horas de entrada e saída, o que contribuíu a reducir o tráfico rodado e á conseguinte mellora da seguridade. Esa medida complementarase agora co aproveitamento de novos espazos para uso peonil tanto na zona de acceso ao colexio coma na do parque infantil.