NO 2020 RECOLLÉRONSE 17.660 QUILOS

A recollida de plásticos agrícolas multiplícase por 6 coa implantación dun sistema de recollida a domicilio

Os produtores interesados en utilizar o servizo poden chamar ao Punto Limpo

Xoves 15 de abril do 2021 Carballo ao día

No ano 2020 recolléronse no noso concello un total de 17.660 quilos de plásticos agrícolas, segundo o balance que vén de presentar a empresa autorizada que se encarga da xestión deste residuo precisamente dende o ano pasado. Esa cantidade multiplica por seis os depósitos que se viñan realizando nos anos anteriores no Punto Limpo, no que se contabilizaron 3.240 quilos no 2018 e 2.700 no 2019.

Co obxectivo de facilitar a correcta xestión dos plásticos agrícolas, o Concello de Carballo ofrece aos produtores interesados a posibilidade de dispoñer dun servizo a domicilio. As persoas interesadas deben chamar ao Punto Limpo (981 754 917) e facilitar os seus datos persoais (nome, teléfono de contacto e punto de recollida) para que a empresa poida establecer un calendario de recollida. A maiores existe un sistema similar de recollida para os socios da cooperativa Coreber. Os plásticos deben estar o máis limpos posible e atados de xeito que se facilite a súa retirada.

Lonas do silo e sacos procedentes dos rolos de herba son os principais residuos que moitas veces a veciñanza non sabe onde tirar. Con esta iniciativa ambiental promovida polo Concello de Carballo é posible, por unha banda, manter limpa a contorna e, por outra, xestionar estes refugallos do xeito apropiado. Así, esta empresa xestora de ámbito autonómico encárgase posteriormente do transporte dos plásticos ata a planta de tratamento, onde son sometidos a un proceso mecánico de reciclaxe do que se obtén materia prima para a fabricación doutros produtos, dándolles así unha nova vida.