Lingua

Evencio Ferrero participou no primeiro Encontro lusófono organizado polo IES Alfredo Brañas

Xoves 4 de maio do 2023

O alcalde participou no primeiro Encontro lusófono organizado polo IES Alfredo Brañas, desde o seu Equipo de Dinamización da Lingua Galega (EDLG) e coa colaboración dos departamentos de Lingua galega e literatura e de Xeografía e Historia, e mais a Secretaría Xeral de Política Lingüística. Evencio Ferrero compartiu unha parte da mañá do xoves no Pazo da Cultura co alumnado de 3º da ESO e 1º de bacharelato; o secretario xeral de Política Lingüística, Valentín García; a cantora Uxía, o músico brasigalego Sérgio Tannus e o promotor cultural galego Vítor Belho, responsable de Nordesía Producións.

O estudantado tivo oportunidade de coñecer de primeira man as principais iniciativas que se desenvolven en Galicia arredor da lusofonía e da promoción do uso do galego neste ámbito (Cantos na Maré-Maré, AriTmar, Semana de Convergências Portugal-Galiza...), para complementar así os contidos curriculares vistos nas aulas durante este curso.

Evencio Ferrero felicitou ao IES Alfredo Brañas pola iniciativa

Os obxectivos da iniciativa, que desenvolve desde o ámbito do ensino as directrices da Lei 1/2014, do 24 de marzo, para o aproveitamento do portugués e vínculos coa lusofonía (Lei Paz-Andrade), son incidir nas vantaxes que para o galego ten o portugués e visibilizar e poñer en valor a orixe común e proximidade lingüística, social e cultural dos idiomas falados ás dúas beiras do Miño. Cómpre salientar que o IES Alfredo Brañas é un dos centros dependentes da Consellería de Cultura, Educación, Formación Profesional e Universidades que ofrecen a materia de portugués como lingua estranxeira en todos os niveis da ESO e BAC.