Lingua

Participa no concurso de lemas "Desmontando os mitos do amor romántico" en Instagram!

As concellarías de Normalización Lingüística e Igualdade tratan de concienciar á mocidade sobre os falsos tópicos asociados ao amor romántico

Luns 1 de febreiro do 2021

As áreas de Igualdade e Normalización Lingüística do Concello de Carballo convocan o I Concurso de lemas “DESMONTANDO OS MITOS DO AMOR ROMÁNTICO” con motivo do Día do Amor/San Valentín (14 de febreiro) con intención de concienciar ás mozas e mozos sobre os falsos tópicos asociados ao amor romántico, coma os seguintes:

• O amor pode con todo
• O amor de parella indispensábel para dar sentido á vida
• Cando se está namorado é imposíbel sentir atracción por outra persoa. O amor é posesión e exclusividade
• Estamos predestinados a estar xuntos: somos almas xemelgas/é a miña media laranxa, complétame
• Os celos son unha proba de amor

1. A participación no I Concurso de Lemas “Desmontando os mitos do amor romántico” está aberta a calquera persoa usuaria de Instagram, sen límite de idade.
2. Só se admitirán lemas en galego.
3. Para participar será preciso utilizar unha imaxe ou vídeo nos que poida lerse ou escoitarse o lema proposto, que, preferentemente, non superará os 10 segundos de duración. Con todas as imaxes e/ou vídeos participantes elaborarase un resumo final na que figurarán as distintas propostas e a autoría de cada unha delas.
4. O prazo para participar estará aberto dende as 00.00 horas do día 2 ata as 24.00 horas do día 12 de febreiro de 2021.
5. As persoas que queiran participar publicarán as imaxes e/ou vídeos cos lemas nas súas contas persoais, etiquetando a  @carballomola. No texto adxunto incluiranse os cancelos #desmontandoamorromántico #igualdadecarballo  #normalizaciónlingüísticacarballo e #díadoamorcarballo. Ademais, no prazo indicado terán que enviar as imaxes e/ou vídeos por whatsapp ao número 604072887, indicando nome completo, localidade de residencia, teléfono de contacto (de ser un diferente ao utilizado para o envío) e nick de Instagram.
6. Todas as persoas participantes recibirán un agasallo da campaña “eu quero a Carballo”.
7. Entre todas as persoas participantes sortearase un xantar/cea para dúas persoas nun establecemento hostaleiro de Carballo. En función da situación sanitaria e das restricións vixentes, se non é posible gozar do premio no propio establecemento, o xantar ou cea será para levar ou para servir a domicilio.
8. O Concello de Carballo poderá utilizar os lemas en futuras campañas que contribúan a seguir avanzando cara a igualdade entre mulleres e homes.