.jpg)
O obradoiro dual de emprego Carballo Coida II formará a unha nova promoción de profesionais da atención sociosanitaria
A Xunta de Galicia vén de aprobar o proxecto de formación para o emprego presentado polo Concello, que ten un orzamento de 552.046,20 euros
Luns 9 de outubro do 2023 Benestar
Carballo contará cun novo obradoiro dual de emprego centrado na formación de profesionais na atención sociosanitaria a persoas dependentes en institucións sociais. A Xunta de Galicia vén de aprobar o proxecto presentado polo Concello, coa correspondente consignación económica: 552.046,20 euros, financiados case na súa totalidade con fondos autonómicos.
O delegado territorial da Xunta, Gonzalo Trenor, fixo o anuncio nunha visita ás instalacións do Fórum Carballo que acollerán o curso acompañado polo alcalde, Evencio Ferrero, e outros membros da corporación municipal.
O obradoiro dual de emprego Carballo Coida II permitirá formar a unha nova promoción de 20 alumnos e alumnas, divididos en dous grupos para optimizar os recursos formativos. O curso consta de 1.920 horas, que se impartirán ao longo de todo un ano. Ao remate, o alumnado traballador obterá o certificado de profesionalidade de nivel II en atención sociosanitaria a persoas dependentes en institucións sociais.
Os módulos teórico-prácticos impartiranse nas instalacións do edificio municipal Fórum Carballo, e o módulo de prácticas profesionais realizarase en entidades colaboradoras, nas que o alumnado poderá adquirir experiencias e habilidades profesionais e aplicar os coñecementos adquiridos na práctica real dunha entidade de iniciativa pública ou social.