.jpg)
A creación dunha senda peonil dende a Igrexa ata A Canosa é unha das principais demandas do Consello Parroquial de Rus
A próxima xuntanza está prevista para o xoves 19 no Centro Social de Verdillo
Venres 13 de maio do 2022
Imaxe da xuntanza do Consello Parroquial de Rus
Unha das principais demandas do Consello Parroquial de Rus é a construción dunha senda peonil que facilite os desprazamentos da veciñanza entre A Canosa e a Igrexa. A solicitude non é nova, pero foi reiterada na xuntanza deste xoves. O alcalde, Evencio Ferrero, explicou que, ao tratarse dunha vía provincial, a actuación está suxeita aos criterios da Deputación, polo que ou ben se consegue a cesión do 100% dos terreos afectados ou ben sería preciso iniciar un proceso de expropiación. En calquera caso, pola súa parte ofreceuse a volver a trasladar a petición veciñal ao organismo provincial.
Do mesmo xeito, dende o Concello de Carballo trasladadase á Xunta de Galicia outra demanda para mellorar a visibilidade e a seguridade viaria no acceso á estrada autonómica AC-400 no lugar do Outón.
Tamén quedou o Concello encargado de reiterar ás compañías telefónicas a solicitude da veciñanza para completar a cobertura de telefonía móbil nos lugares da parroquia que aínda carecen dela. Por parte do Consello Parroquial pediuse tamén a instalación dunha rede wi-fi no Centro Social de Rus.
Como na xuntanza do martes en Entrecruces, en Rus tamén houbo queixas polos danos e obstáculos que provocan na rede viaria as empresas madeireiras, e reclamaron unha maior contundencia na aplicación de sancións.
O Consello Parroquial trasladoulle ao alcalde outras necesidades, como a instalación de marquesiñas ou a reposición de sinais, ademais de propostas de arranxo de vías ou de mellora da roza. A instalación de aparatos de ximnasia para maiores en distintos puntos da parroquia foi outra das demandas.
As próximas xuntanzas serán nos centros sociais de Verdillo, o día 19; Ardaña, o 24; Imende (Consello Parroquial de Noicela-Rebordelos), o 26, e Vilela, o 31.