Participación veciñal

O proxecto "Carballo na memoria" está presente nas rúas a través de imaxes que nos conectan coa nosa historia

Instalado na Milagrosa un novo panel fotográfico que permite comparar distintas épocas da vila

Sábado 18 de setembro do 2021

O 2 de marzo do ano pasado instalamos na rúa Hórreo o primeiro dunha serie de paneis que inclúen fotografías antigas de Carballo e que nos permitirán comparar un mesmo espazo público en distintas épocas históricas. Esta semana quedou colocado o segundo, nun lugar tan emblemático coma a ponte que mesmo lle dá nome ao barrio da Milagrosa. De non ser pola capela e o convento, que se ven ao fondo á dereita, non sería doado recoñecer o cruce das rúas Berdillo, Compostela, Cemiterio Vello e Avenida da Milagrosa tal como podían velo os carballeses e as carballesas de hai un século.

A iniciativa forma parte do proxecto “Carballo na memoria”, que continúa a medrar coas achegas da cidadanía e conta xa con máis de 2.000 fotografías dixitalizadas. Grazas a ese gran fondo documental, co que vos convidamos a seguir colaborando, poderemos seguir estendendo o proxecto a outros espazos públicos. Tan só tedes que poñervos en contacto co Concello a través do enderezo comunicacion@carballo.gal para que poidamos escanear as vosas fotografías antigas e devolvelas en perfectas condicións xunto cunha copia dixital.

Dentro dese proceso de recuperación da nosa memoria histórica tamén está a lona que colocamos nas antigas escolas do xardín co gallo do 90º aniversario da súa construción, xa no 2019, no que tamén cumpriron 90 anos a Praza de Galicia (antes Praza da Liberdade) e o Mercado Municipal. Co gallo desa efeméride, o historiador local Xan Fraga Rodríguez elaborara un libriño que segue a disposición das persoas interesadas, de balde e ata fin de existencias, na Casa do Concello.