.jpg)
Estreamos un programa de mentorización e formación para concesionarios de postos no mercado municipal
No caso de que queden prazas libres, a iniciativa da Concellaría de Feiras e Mercados abrirase a outros establecementos
Sábado 30 de setembro do 2023 Mercado Municipal
.jpeg)
Do 11 ao 30 de outubro desenvolverase o programa “Mercado en formación”, unha iniciativa da Concellaría de Feiras e Mercados, que dirixe Ramón Varela, coa que pretendemos mellorar a competitividade das empresas situadas no mercado municipal de abastos e seguir traballando na súa promoción. O proxecto, que conta co apoio da Consellería de Economía, Industria e Innovación, abrirase a outros establecementos de comercialización de produtos de proximidade e hostalaría sempre que queden prazas libres.
Para dar a coñecer a iniciativa, o día 3 de outubro, ás 17.30 horas, celebraremos un acto aberto no propio mercado. A partir dese momento abrirase un prazo de inscrición, ata o día 11, para todos os empresarios interesados, que deberán dirixirse á xerencia da praza de abastos.
O programa desenvolverase ao longo do mes de outubro. Por unha parte inclúe mentorizaxe individual para todos os interesados, con profesionais que analizan á a súa situación e tratarán de achegarlles as claves para mellorar a súa posición. Por outra banda están previstas sesións colectivas que serán impartidas por expertos/as en distintas áreas. O programa é o seguinte:
- 11 de outubro. Plan de viabilidade. As empresas deben ser viables e sostibles no tempo. Aprenderemos a analizar os datos da nosa empresa: balances, estudo de custos e outras ferramentas de control.
- 16 de outubro. Conservación de produtos e envases para take away. Afondaremos nas técnicas de envasado ao baleiro e os sistemas de conservación de alimentos, ademais de anticiparnos ás normas sobre residuos cero.
- 23 de outubro. Atención ao cliente online. Formación dirixida a profesionais que traballen cara o público. Poremos en práctica as normas básicas de recepción e atención ao cliente baseadas nos protocolos da denominada “cultura do detalle”.
- 30 de outubro. Comercialización de produtos online. A nova economía. Abordaremos a venda a domicilio e as ferramentas que permitirán á nosa clientela tanto a realización de encargas coma o pago a distancia.