.jpg)
A Concellaría de Feiras e Mercados pon en marcha o proceso de solicitude de autorizacións para vender nas feiras
Os/a vendedores/as ambulantes poderán realizar o trámite do 3 ao 30 de novembro, e os/as pequenos/as produtores/as, no mes de decembro
Luns 31 de outubro do 2022
.jpg "Este domingo realizouse unha campaña informativa nos dous espazos da feira")
Este domingo realizouse unha campaña informativa nos dous espazos da feira
A Concellaría de Feiras e Mercados abre, como todos os anos, o proceso de solicitude de autorizacións para exercer a venda ambulante nas feiras e tamén para a comercialización de produtos da horta por parte de pequenos/as produtores/as do concello e da contorna. Aproveitando o feirón deste domingo realizouse unha campaña informativa entre os/as vendedores/as habituais.
Para as persoas que se dedican á venda ambulante o prazo de solicitude estará aberto entre o 3 e o 30 de novembro. As solicitudes presentaranse preferentemente por vía telemática, acompañando a documentación establecida na Ordenanza reguladora de feiras, mercados e venda ambulante do Concello de Carballo e que se especifica no modelo de solicitude distribuído este domingo. A ordenanza vixente, aprobada o ano pasado, establece algunhas novidades, como a ampliación do período de vixencia das autorizacións ata un máximo de cinco anos ou o pago anual. As tarifas son as mesmas que se veñen aplicando dende o ano 2011.
Tamén hai algunhas novidades que afectan a pequenos/as produtores/as que se achegan ás feiras cos seus excedentes. Neste caso, os/as interesados/as deben formalizar a súa inscrición no censo de vendedores/as non permanentes cubrindo o modelo que pode descargarse máis abaixo, e no que deben indicar que produtos van vender e o lugar de orixe dos mesmos, así como a superficie que van ocupar. A inscrición será anual, pero os pagos realizaranse cada tres meses, segundo o número de feiras ás que asistiran no trimestre anterior. O prazo estará aberto durante todo o mes de decembro.
