Máis de 500 persoas participaron este verán nas actividades do programa medioambiental “Eu quero Razo-Baldaio”
O programa sumouse á conmemoración do Ano do Xestal cunha escultura de madeira tallada con motoserra
Luns 11 de setembro do 2023
Un total de 527 persoas participaron este verán nas actividades do programa medioambiental Eu quero Razo-Baldaio, organizado pola Concellaría de Medio Ambiente coa colaboración de entidades como a Asociación Ambiental Senda Nova, a Asociación para a defensa ecoloxica de Galiza (Adega), o Grupo Naturalista Hábitat, a Asociación Astronómica IO, a Coordinadora para o estudo dos mamíferos mariños (Cemma), Balonmán Xiria, Ecovidrio e Gadis.
Na maior parte das iniciativas foi preciso ampliar o límite de participantes, e aínda así quedaron escasas en boa parte delas. Un ano máis trunfaron as actividades nocturnas, como a noite das avelaíñas, á ruta ata a Eira das Meigas ou a noite astronómica. A estas propostas, que xa se levaron a cabo tamén en edicións anteriores, sumouse nesta ocasión a ruta a pé de Carballo a Razo polas sendas do proxecto Cicl-Ando Carballo, que reuniu a 116 persoas.
Aínda que o tempo non acompañou, tamén foi numerosa a participación na Festa da Praia, unha actividade de ocio familiar que pretendemos potenciar e mesmo estender a outros puntos do litoral.
Ademais das 14 actividades grupais incluídas no programa, este ano tamén contamos co artesán Fabián Lage para acometer a restauración das esculturas da píllara de Razo, o arroaz da Pedra do Sal e a nebria das praias do Castrillón, todas elas elaboradas nos últimos anos reciclando distintos materiais. E ademais tivemos traballando en Razo a Yosi Fervenza coa súa motoserra para tallar unha escultura de madeira de Carlos O Xestal, unha homenaxe máis neste Ano do Xestal. Unha vez rematada, a Concellaría de Participación Veciñal, coa colaoración do movemento asociativo da parroquia de Lema, trasladou a figura ao centro social de Centeás, no que foi inaugurada cun emotivo e concorrido acto de recoñecemento ao gran artista e humorista que viviu durante anos nesta parroquia.