.jpg)
MÉRCORES 18, ÁS 20.30 HORAS, NO CENTRO SOCIAL SAN XOÁN BAUTISTA
Unha conferencia do historiador Ángel Peña coroa o paso por Carballo dunha das mellores coleccións de beléns do mundo
Sábado 14 de xaneiro do 2023
.jpg "Ángel Peña, con Teresa Lafragua na inauguración da exposición de beléns no Pazo da Culltura")
Ángel Peña, con Teresa Lafragua na inauguración da exposición de beléns no Pazo da Culltura
O 14 de xuño pasado, o Consello de Ministros aprobou a declaración do belenismo como Manifestación Representativa do Patrimonio Cultural Inmaterial, un paso previo fundamental de cara á candidatura do belén como Patrimonio Cultural Inmaterial da Humanidade. Unha das persoas que contribuíu a acadar ese obxectivo foi Ángel Peña Martín, doutor en Historia da Arte pola Universidade Autónoma de Madrid, especializado na investigación da imaxe relixiosa na Idade Moderna, os seus usos e funcións culturais, a clausura feminina, o Nadal e o belén.
Ángel Peña participou en decembro na inauguración da exposición De Belén ao Finisterrae, que pode verse ata o día 16 no andar -1 do Pazo da Cultura (de luns a venres, de 16.30 a 20.30 horas), e este mércores 18 coroará o paso por Carballo dunha das mellores coleccións de beléns do mundo coa conferencia titulada O belén, patrimonio inmaterial. O acto celebrarase ás 20.30 horas no Centro Social San Xoán Bautista, coa colaboración da parroquia de Carballo.
Ángel Peña é un dos belenistas máis recoñecidos do país. A petición do Ministerio de Cultura realizou no ano 2021 o estudo sobre as orixes e historia do belén en España no que se fundamentou o informe técnico para o expediente de declaración de Manifestación Representativa do Patrimonio Cultural Inmaterial.
Ten impartido numerosas conferencias sobre o belén, así como relatorios e comunicacións en congresos e seminarios de ámbito nacional e internacional. É autor de numerosas publicacións e foi director da revista Belén, que edita a Asociación de Belenistas de Madrid. Tamén ten comisariado varias exposicións, entre elas a que pode verse en Carballo, e, como recoñecemento ao seu traballo arredor do belén, no ano 2010 recibiu a Insignia de Prata da Asociación de Belenistas de Madrid e no 2016, o Trofeo da Federación Española de Belenistas.
