.jpg)
Constituída en Carballo a Fundación Manuel Facal
Venres 2 de setembro do 2022 Cultura
Manuel Facal
O pasado 11 de agosto constituíuse en escritura pública a Fundación Manuel Facal, entidade sen ánimo de lucro que ten como obxectivo a conservación, promoción e difusión da obra do artista carballés Manuel Facal, así como da arte contemporánea en xeral.
O Padroado da Fundación Manuel Facal está presidido polo propio artista, mentres que como vicepresidente figura Evencio Ferrero, alcalde de Carballo, e como secretario, Jorge Mareque Facal. Nas vindeiras semanas sumaranse ao Padroado diferentes colaboradores e personalidades do mundo da arte que conformarán o Consello Asesor da Fundación.
A Fundación terá a súa sede permanente en Carballo, nun edificio que será rehabilitado como Museo Manuel Facal e que albergará boa parte da obra do artista carballés, entre pinturas, gravados e esculturas. Pretende ser un espazo vital, no que poderá expoñerse ao público o legado dun dos artistas galegos máis representativos da súa xeración. Así, a obra de Manuel Facal está presente en importantes coleccións de España, Estados Unidos, Francia, Alemaña, Venezuela, Porto Rico, Brasil, Arxentina, Bélxica, Noruega, Portugal e Holanda.
Entre as actividades que desenvolverá a Fundación destacan a edición de publicacións, exposicións, congresos e ciclos de conferencias sobre arte contemporánea, que converterán a Carballo nun referente da arte contemporánea actual.
A Fundación agarda contar co apoio de institucións públicas como o Concello de Carballo, a Deputación da Coruña e a Xunta de Galicia, así como de empresas privadas, para a creación deste novo espazo museístico, no que os visitantes poderán para atopar obras de Manuel Facal de diferentes épocas, que forman parte da extraordinaria colección privada do artista.