Cultura

Cinco agrupacións musicais e alumnado de dous colexios participan este ano na lectura colectiva “As letras en voces”

A Banda Municipal de Gaitas ofrecerá un pasarrúas a partir das 11.30 para anunciar o comezo da celebración do Día das Letras Galegas

Martes 16 de maio do 2017 Cultura

Este ano as Letras Galegas non só teñen voz, senón tamén música. “As letras en voces”, a tradicional lectura colectiva de autores/as homenaxeados o 17 de maio, contará coa participación de alumnos de dous centros educativos, pero tamén de cinco agrupacións musicais.

A Banda Municipal de Gaitas será a encargada de anunciar o comezo da celebración do Día das Letras Galegas cun pasarrúas a partir das 11.30 horas. Xa de volta no Xardín Municipal, que será o centro da xornada, os gaiteiros interpretarán as últimas pezas e o Himno Galego, antes de que comece a lectura. Este ano participarán nenos e nenas dos CEIP A Cristina e Bergantiños. Pero como a intención do Concello de Carballo é darlle un ambiente festivo á xornada, a lectura complementarase coas actuacións da asociación cultural Argazo, a Coral Ribeiras do Anllóns, o grupo Xoldreira da AC Nemeth e Arume.

“As letras en voces” coincidirán no espazo da Praza do Concello e tamén no tempo con outra actividade tradicional do 17 de maio en Carballo, o Concurso Infantil de Pintura e Debuxo Luis Calvo Sanz, organizado pola asociación cultural Lumeira dende hai 37 anos. Comezará ás 11 horas e poderán participar nenas e nenos dende 1º de Primaria ata 2º da ESO. Haberá tres premios, consistentes en lotes de libros, por categoría; premio ao colexio e sorteo de bicicletas.

Tanto “As letras en voces” como o concurso celebraranse ao aire libre agás que as condicións meteorolóxicas non o permitan. Nese caso trasladaríanse ao segundo andar do mercado municipal.