Cultura

José Ramón Luna de la Ossa, fotógrafo madrileño afincado en Cuenca, gañador do Certame Fotográfico Xosé Manuel Eirís

O segundo premio, patrocinado pola Fundación Luis Calvo, é para Samuel Ortiz Lois, e o Premio Especial Carballo, para o italiano afincado en Galicia Simone Maestra. O xurado decidiu outorgar un accésit á obra presentada por Alf

Domingo 19 de marzo do 2017

José Ramón Luna de la Ossa, gañador do certame

José Ramón Luna de la Ossa, fotógrafo madrileño afincado en Cuenca, e o gañador do primeiro premio do Certame Fotográfico Xosé Manuel Eirís, dotado este ano con 1.500 euros e diploma, pola fotografía Teatro de lo humano. O segundo premio, patrocinado pola Fundación Luis Calvo Sanz con 750 euros, é para o Autorretrato con praia de Samuel Ortiz Lois.

Este ano o Premio Especial Carballo, dotado con 500 euros e diploma, é para a fotografía Nomad, do italiano afincado en Galicia Simone Maestra. Ademais, o xurado decidiu outorgar un accésit de 300 euros e diploma á obra Nómadas, de Alfonso Rego López. 

Un ano máis, o Certame Fotográfico Xosé Manuel Eirís destacou pola calidade e a variedade das obras presentadas. O xurado, presidido polo concelleiro de Cultura, Marcos Trigo Facal, estivo integrado ademais por María del Mar Barca Gómez, en representación da Asociación de Familiares de Enfermos de Alzhéimer de Bergantiños (Afaber); Ángel Cordero Gómez e Ignacio Romero Sánchez, fotógrafos profesionais e profesores de Fotografía da Escola de Imaxe e Son da Coruña; Vari Caramés, fotógrafo profesional; Beatriz Fernánde Cortizas, licenciada en Belas Artes na especialidade de Deseño e Audiovisuais e profesora de Debuxo, e Nuria Cortés Bernárdez, auxiliar administrativa da Concellaría de Cultura, que exerceu coma secretaria.

O acto de entrega de premios e inauguración da exposición está previsto para o vindeiro xoves 30 de marzo ás 20.30 horas no 3º andar do Pazo da Cultura.