"La Reina del pueblo" e "Mataría" conquistan o palmarés da 8ª edición do Festival de Contidos Dixitais Carballo Interplay

Belén Puime faise co Premio a mellor proxecto de serie en galego con Pringadas, unha comedia xeracional que se estreará na próxima edición do CIP

Domingo 12 de setembro do 2021

"Mataría" (Foto: Leo López)

A 8ª edición do Festival de Contidos Dixitais Carballo Interplay, que se celebrou dende o mércores en Carballo e na rede, a través do streaming, pechou o telón esta noite coa gala de entrega de premios ás mellores series para web na que triunfaron a revisión post-millennial do costumbrismo castizo en clave de humor La Reina del pueblo e o humor repunante servido en cómodas doses de Mataría.

"La reina del pueblo" (Foto: Leo López)

O xurado composto por David Pareja, Henar Álvarez, Fer Epelde, Sara Varela e David Fidalgo outorgoulle a La reina del pueblo os premios a Mellor serie estatal, dotado con 800 euros e trofeo, e mellor guión, para Raúl Navarro, dotado con 200 euros e trofeo. O de Mellor serie en versión orixinal en galego, dotado con 800 euros e trofeo, foi para Mataría, que tamén recibiu o do Público. O premio para Mellor serie internacional, dotado con 800 euros e trofeo, foi para a comedia épica dende o interior dun videoxogo Mortal Glitch e o de Mellor dirección, dotado con 200 euros e trofeo, para Beatriz Abad por Riders, unha dramedia que desquicia a resistencia social en tempos pandémicos.

O xurado novo, composto por Sara Riveiro, Lúa Pagán e Tania Prieto decidiu outorgar o seu premio, dotado con 400 euros e trofeo, a Psicóticas Inseguras, unha comedia xeracional chilena feminista, subversiva e terapéutica.

PREMIO AO MELLOR PROXECTO DE WEBSERIE EN GALEGO

Reunido en Carballo o xurado composto por Lucía Estévez, Javi Camino, Andrea Villa e Xose Regueira decidiu outorgar o Premio ao mellor proxecto de webserie en galego, dotado con 3000 euros para a produción dos tres primeiros capítulos, a Pringadas, de Belén Puime, pola necesidade de contidos en galego enfocados á xeración Z, por afondar e conectar coa súa realidade e pola liberdade dunha proposta que fuxe dos estereotipos. A serie estrearase na próxima edición do Carballo Interplay.

PALMARÉS

Mellor serie estatal, dotado con 800 euros e trofeo, para La reina del pueblo
Mellor serie internacional, dotado con 800 euros e trofeo, para Mortal Glitch. Recolle Bastiaan Manitveld
Mellor serie en versión orixinal en galego, dotado con 800 euros e trofeo, para Mataría. Recolle Javier Seoane
Premio do xurado novo, dotado con 400 euros e trofeo, para Psicóticas Inseguras. Recolle Pamela Bravo
Premio do público, dotado con 400 euros e trofeo, para Mataría
Premio a mellor guión, dotado con 200 euros e trofeo, para Raúl Navarro por La reina del pueblo
Premio a mellor dirección, dotado con 200 euros e trofeo, para Beatriz Abad por Riders
Premio ao mellor proxecto a serie web en galego para Pringadas, de Belén Puime