Os Ratos de Lonxedetodo apúntanse ao “streaming” para seguir animando á lectura aos nenos e nenas de Carballo

Despois do espectáculo inaugural desta semana, os simpáticos personaxes de Trinketrinke Teatro visitarán periodicamente a Biblioteca Rego da Balsa ata fin de curso

Xoves 19 de novembro do 2020

Imaxe dunha das actuacións desta semana

Os Ratos de Lonxedetodo chegaron esta semana á Biblioteca Rego da Balsa cargados coas súas maletas cheas de historias ben fermosas para contarlles e contarlles aos nenos e nenas de Carballo. Pero como sempre queren estar á última, estes simpáticos personaxes creados pola compañía Trinketrinke tamén se apuntan ao streaming, de xeito que poderedes ver todas as súas actuacións sen movervos da casa. As retransmisións en directo realizaranse a través das canles de YouTube do Concello de Carballo e da Biblioteca Rego da Balsa, así coma das páxinas de Facebook de Bibliotecas, Cultura e Concello de Carballo, para que teñades onde escoller!

Tamén mantemos as funcións presenciais, pero este curso, debido á situación sanitaria na que nos atopamos, celebraranse no auditorio da Biblioteca Rego da Balsa, cun público máis reducido e cun protocolo de seguridade.

Poderán asistir nenos e nenas de de 5, 6 e 7 anos e unha persoa adulta por cada grupo de conviventes. As reservas realizaranse exclusivamente por teléfono, no 981 758 580, dende o mércores anterior a cada función.

Como vén sendo habitual, os Ratos de Lonxedetodo ofrecerán dúas sesións de cada espectáculo: ás 17:00 e ás 18:30 horas. O primeiro, “Aprendendo a querer”, foi este mércores, pero aquí tedes o calendario previsto para este curso:

2 de decembro: “Contos para protexer á infancia dos abusos sexuais”
3 de febreiro: “Imos inventando contos”
17 de febreiro: “Ovos, letras e galiñas”
3 de marzo: “A festa da poesía das catro estacións”
17 de marzo: “O coelliño branco”
31 de marzo: “Paxariños”
14 de abril: “Contos para andar o camiño”
28 de abril: “Lonxedetodo en festas!”
12 de maio: “Os ratiños da caixa”
26 de maio: “Viaxe a África”