A Biblioteca Rego da Balsa abre as súas portas físicas e tamén as virtuais para encher de animación os sábados do outono

O programa de actividades de animación á lectura “Ler conta moito” arrinca esta semana co espectáculo de Magín Blanco “O que levamos nas maletas”

Xoves 10 de setembro do 2020

Este sábado regresan as actividades infantís á Biblioteca Rego da Balsa, con moitas novidades na programación pero tamén no desenvolvemento dos espectáculos. Debido á situación sanitaria que estamos a vivir, o aforo será moi limitado e sempre con inscrición previa no 981 758 580, pero para que todos os nenos e nenas poidan gozar das atractivas propostas que temos preparadas, ademais de abrir as portas físicas, tamén abriremos as virtuais. Deste xeito, os espectáculos poderán verse en directo a través das canles de YouTube do Concello e das Bibliotecas de Carballo e tamén das páxinas de Facebook das Bibliotecas, o Concello e Cultura Carballo.

Para que vexades con canta forza regresamos, este sábado teremos na Biblioteca Rego da Balsa nin máis nin menos que a Magín Blanco, que nos presentará o espectáculo “O que levamos nas maletas”, unha proposta musical na que será imprescindible a colaboración do público tanto para a interpretación das cancións coma para a resolución das cuestións que formula o seu libro “Camiños”. Esta primeira actividade do outono, que forma parte do programa "Ler conta moito", está dirixida a nenos e nenas de 6 a 10 anos.

Pero temos moitas máis! Bota unha ollada.

• 12 setembro, 11.30 horas: “O que levamos nas maletas”. Concerto infantil de Magín Blanco (Programa Ler conta moito)
• 18 setembro, 17.00 horas: “Que morro!”. Contacontos infantil con Caxoto (Rede Cultural da Deputación da Coruña)
• 19 setembro, 11.30 horas: “A máquina do tempo”. Contacontos teatral da compañía Ghazafhellos (Ler conta moito)
• 26 setembro, 11.30 horas: “Contos da lúa”. Contacontos infantil coa compañía Trécola Teatro (Ler conta moito).
• 3 outubro, 11.30 horas: “Historias fabulosas, dous magos e outras cousas”. Espectáculo de Ian e Elisa que combina contacontos, maxia e sombras chinesas (Ler conta moito).
• 7 outubro, 17.00 horas: “Antia, Wamba e o regato pequeno". Contacontos infantil con Tropa de Trapo (Ler conta moito).
• 17 outubro, 11.30 horas: “Patrimonio Natural”. Concerto infantil de Gloria Mosquera, de Mamá Cabra, e Tomi López (Ler conta moito).
• 31 outubro, 11.30 horas: “Estrafalaria”. Contacontos infantil con Xarope Tulú (Agadic).