A PROBA ORGANIZADA POLO CLUB CICLISTA CARBALLO SERÁ OS DÍAS 6 E 7 DE ABRIL
Carballo volve a ser a sede da Challenge Junior, que nesta segunda edición será máis dura e primará a participación feminina
Máis de oitenta deportistas de Galicia, Cantabria, Asturias, Castela-León, Castela-A Mancha e Portugal participarán na proba, incluída no Campionato Galego
Xoves 28 de marzo do 2019
Marcos Trigo, Xosé Regueira, Juan Seoane, Evencio Ferrero, Vanesa Loureiro (que se sumou ao remate), Juan Carlos Muñiz e Guillermo Sande
Carballo acollerá os días 6 e 7 de abril a II Challenge Junior, unha proba organizada polo Club Ciclista Carballo, coa colaboración do Concello e da Federación Galega, que reunirá a 81 promesas do ciclismo galego, pero tamén a deportistas de Asturias, Cantabria, Castela-León, Castela-A Mancha e Portugal.
A II Challenge Junior constará de tres probas independentes, como o ano pasado, pero será un pouco máis dura e primará a participación feminina. Neste sentido, unha das novidades é que haberá trofeo para a mellor ciclista en cada unha das categorías, e tamén se establece este ano o premio ao mellor equipo. Explicouno esta mañá o director deportivo do Club Ciclista, Juan Seoane, na presentación deste novo evento deportivo, na que estivo acompañado polo presidente da Federación Galega de Ciclismo, Juan Carlos Muñiz; o técnico e seleccionador galego, Guillermo Sande; os concelleiros de Deporte e Promoción Económica, Marcos Trigo e Xosé Regueira, e o alcalde de Carballo, Evencio Ferrero.
A primeira etapa, Razo-Monte Neme, sairá o sábado ás 11.00 horas. Ese mesmo día pola tarde, ás 16.30, arrancará Razo-Razo, que incrementa o seu percorrido en seis quilómetros, ata os 66, con respecto ao ano pasado, e incorpora treitos de maior dureza. A terceira proba será o domingo, co percorrido habitual de 89,5 quilómetros polos concellos de Coristanco e Carballo, e que terá a meta situada na rúa Martín Herrera, xunto ao Museo de Bergantiños.
Presentación
A presentación da proba estivo repleta de agradecementos mutuos entre organizadores e colaboradores, pero tanto uns coma outros destacaron sobre todo a importancia de promover o deporte de base e, ao mesmo tempo, de converter o deporte nun elemento máis de desenvolvemento turístico _e polo tanto económico_ do territorio. Neste sentido, o concelleiro e deputado provincial Xosé Regueira comentou que dende os entes de xestión turística está empezándose a traballar en organizar eventos deportivos para atraer público, “algo que en Carballo xa levamos tempo facendo, porque o deporte atrae persoas, xera economía e crea marca”. Xosé Regueira considera que este tipo de eventos son “moi positivos para a economía local”, polo que apelou á implicación do sector hostaleiro, e ao mesmo tempo cualificou coma “unha sorte que existan clubs que programan con tanta calidade”.
Dende a Federación Galega de Ciclismo, o seu presidente definiu ao Club Ciclista Carballo coma un modelo na organización de probas de “moitísimo nivel”. Neste caso, ademais, trátase dunha proba valedeira para o Campionato Galego, pero para Juan Carlos Muñiz o realmente importante é a promoción do deporte de base. Tanto el coma Guillermo Sande agradeceron e destacaron o traballo do Club Ciclista, porque “unha proba de dous días para júnior é como se fixeran unha etapa da Volta á España”, asegurou o seleccionador galego.
Evencio Ferrero desexou “mil primaveras máis para esta challenge” e reiterou a aposta do Concello de Carballo polo deporte incluso nos momentos máis duros. “Somos un dos concellos a nivel de Estado que máis investimento temos en deporte”, manifestou o alcalde, quen tamén aludiu ao “espectacular” crecemento do deporte nos últimos 10 anos en Carballo.