Solidariedade e deporte van da man na intensa xornada programada por Escola Lubiáns para o sábado 15

Representantes do club, acompañados polo concelleiro de Deporte e o alcalde, presentaron hoxe o programa de actividades

Xoves 13 de decembro do 2018

O Pavillón Carballo Calero acolle este sábado, 15 de decembro, unha intensa xornada festiva e deportiva para a Escola Lubiáns, que preparou un amplo programa no que tamén haberá espazo para a solidariedade. Desde as 16.00 horas os afeccionados poderán desfrutar de tres partidos de hockéy e dunha exhibición de patinaxe, e o club aproveitará para facer as fotos oficiais de todos os seus equipos esta temporada. Representantes da Escola Lubiáns, acompañados polo concelleiro de Deporte, Marcos Trigo, e o alcalde, Evencio Ferrero, presentaron hoxe a iniciativa.

Programa

Ás 16.00, Escola Lubiáns Aislamientos San Juan-Diver Patín B, da cuarta xornada da Liga Micro Sur.
Ás 18.30, amigable entre os rapaces das escolas do club.
Ás 19.00, exhibición de patinaxe.
Ás 19.30, sesión fotográfica.
Ás 20.00, Lubiáns Maracaná-HC Liceo, da cuarta xornada da Liga de Veteranos Autonómica Masculina.

Durante este encontro, cando se marque o primeiro gol, terá lugar unha choiva de peluches, que será doados aos rapaces e rapazas desfavorecidos da zona. Todos os afeccionados que o desexen poderán acudir ao pavillón con bonecos e participar deste fermoso xesto solidario.

I Campus de Nadal

A Escola Lubiáns tamén programou para estas datas festivas o seu I Campus de Nadal, que se celebrará no polideportivo Carballo Calero os días 26, 27 e 28 de decembro, de 9.30 a 13.30 horas. Destinado a nenas e nenos nacidos entre 2007 e 2013 (ámbolos dous anos incluídos), ofrecerá unha experiencia de adestramentos personalizados, metodoloxía dinámica e avanzada, exemplificacións e outras actividades complementarias, ademais de contar coa colaboración dos xogadores do primeiro equipo do club. Toda a información e inscricións (que remata esta mesma semana), no pavillón Carballo Calero ou en escolalubians@hotmail.com.